Microsoft-მა ახალი ვირტუალური ასისტენტი Scout-ი წარადგინა

Microsoft-მა ახალი ვირტუალური ასისტენტი Scout წარადგინა, რომელიც კომპანიებს ყოველდღიური სამუშაოს ორგანიზებაში დაეხმარება. მისი მთავარი განსხვავება ის არის, რომ სისტემა მხოლოდ ერთ მომხმარებელზე მიბმული ხელსაწყო არ იქნება და ორგანიზაციის შიგნით ცალკე სამუშაო ერთეულივით იმუშავებს.

Scout სან-ფრანცისკოში გამართულ კონფერენციაზე წარადგინეს. ის Microsoft-ის სხვა ხელსაწყოებისგან, მათ შორის Copilot-ისგან, იმით განსხვავდება, რომ ორგანიზაციის შიდა სისტემებში საკუთარი პროფილი ექნება. ასისტენტი გამოჩნდება ელექტრონულ ფოსტაში, კალენდარში და სხვა სამუშაო სივრცეებში, რაც თანამშრომლებს მასთან პირდაპირ ურთიერთობის საშუალებას მისცემს. Scout-ს შეეძლება შეხვედრების განრიგის მართვა, თანამშრომლების შეკითხვებზე პასუხის გაცემა და სხვა ყოველდღიური დავალებების შესრულება. Microsoft-ის წარმომადგენლის, ჩარლზ ლამანას განმარტებით, ასისტენტით სარგებლობა გუნდის რამდენიმე წევრს ერთდროულად შეეძლება, რაც მას საერთო სამუშაო რესურსად აქცევს. თავდაპირველად Scout GitHub Copilot-ის გამომწერებისთვის იქნება ხელმისაწვდომი, ხოლო მომავალში მისი ფასი გამოყენების მოცულობაზე იქნება დამოკიდებული. Microsoft ამ მიმართულებით ცდილობს, ხელოვნური ინტელექტის სისტემები უფრო აქტიურად ჩართოს სამუშაო პროცესებში და ისინი სტანდარტული პროგრამული პაკეტების ნაწილად აქციოს.

წყარო: Investing.com