Morgan Stanley-მ Adobe-სა და Workday-ის აქციებზე ნეგატიური შეფასება გასცა

Morgan Stanley-მ სამშაბათს პროგრამული უზრუნველყოფის სექტორის ახალი ანალიზი გამოაქვეყნა, სადაც Adobe-სა და Workday-ის აქციებს Underweight რეიტინგი მიანიჭა, ხოლო მთლიან სექტორზე პოზიტიური შეფასება შეინარჩუნა.

ანგარიშის გამოქვეყნების შემდეგ Adobe-ის აქციები პრემარკეტზე 3.8%-ით დაეცა, Workday-ის 4.2%-ით, Salesforce-ის 2.9%-ით, ხოლო Intuit-ის - 4.3%-ით. Morgan Stanley-ის ანალიტიკოსების შეფასებით, Adobe ერთდროულად რამდენიმე მნიშვნელოვან ცვლილებას გადის - კომპანია გადადის freemium მოდელზე, იცვლება ხელმძღვანელობა და მნიშვნელოვნად ზრდის AI-ში ინვესტიციებს. ბანკის აზრით, ეს პროცესები წლიური განმეორებადი შემოსავლების (ARR) დაჩქარებულ ზრდას გააჭიანურებს.

ასევე აღნიშნულია, რომ Adobe-ის ზოგიერთი პროდუქტი ხელოვნური ინტელექტის ახალი გადაწყვეტილებების მხრიდან მზარდ კონკურენციას აწყდება.

Workday-ის შემთხვევაში, Morgan Stanley მიიჩნევს, რომ მიუხედავად ძლიერი საბაზრო პოზიციებისა, კომპანიის AI ინიციატივები უახლოეს პერიოდში შემოსავლების მნიშვნელოვან ზრდას ვერ უზრუნველყოფს.

Salesforce-სა და Intuit-ს ბანკმა Equal-weight რეიტინგი მიანიჭა. Salesforce-ისთვის დადებითად შეფასდა Agentforce-ისა და Slack-ის ზრდა, თუმცა Commerce-ისა და Tableau-ს სუსტი შედეგები საერთო ზრდის ტემპს აფერხებს.

Intuit-ის შემთხვევაში ანალიტიკოსები ფიქრობენ, რომ ინვესტორების შიში, თითქოს დიდი ენობრივი მოდელები (LLM) კომპანიის საგადასახადო და საბუღალტრო პროდუქტებს ჩაანაცვლებენ, გადაჭარბებულია.