ნავთობისა და გაზის გაძვირებამ ევროზონის ეკონომიკაზე სერიოზული გავლენა ვერ მოახდინა
ნავთობისა და გაზის ფასების მკვეთრი ზრდის მიუხედავად, ევროზონის ეკონომიკაზე გავლენა იმაზე ნაკლები აღმოჩნდა, ვიდრე თავდაპირველად ვარაუდობდნენ.
ევროპის ცენტრალური ბანკის ეკონომისტები ამას წიაღისეულ საწვავზე შემცირებული დამოკიდებულებით, სახელმწიფო ხარჯების ზრდითა და ხელოვნურ ინტელექტთან დაკავშირებული ინვესტიციებით ხსნიან.
მათი თქმით, ევროზონის ეკონომიკა ნავთობზე დაახლოებით ორჯერ ნაკლებად არის დამოკიდებული, ვიდრე 1990-იანი წლების დასაწყისში. განახლებადი და ბირთვული ენერგიის წილის ზრდამ რამდენიმე ქვეყანაში გაზისა და ელექტროენერგიის ფასებს შორის კავშირიც შეამცირა.
ეკონომიკის ზრდას ტექნოლოგიურ სექტორში გაზრდილი მოთხოვნა და ხელოვნურ ინტელექტთან დაკავშირებული ინვესტიციებიც უწყობს ხელს. დამატებითი მხარდაჭერა გერმანიის თავდაცვისა და ინფრასტრუქტურის ხარჯებმაც შექმნა. ამ მიმართულებით სახელმწიფო ხარჯების ზრდა ევროზონის მშპ-ის დაახლოებით 0.5%-ს შეადგენს, რაც გასული წლის ბოლოს ნავარაუდევ მაჩვენებელზე ორჯერ მეტია.
ევროპის ცენტრალური ბანკი ფიქრობს, რომ ეს ფაქტორები ეკონომიკას დიდხანს ვერ დაეხმარება. ენერგეტიკულ ბაზრებზე ახალი შეფერხების შემთხვევაში ეკონომიკური ზრდა კვლავ შენელდება, ფასებზე ზეწოლა კი გაიზრდება. ევროპის ცენტრალური ბანკი საპროცენტო განაკვეთების კიდევ გაზრდასაც განიხილავს. წლის განმავლობაში მესამე ზრდას დეკემბერში ელიან.
წყარო: Reuters
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
