Nvidia-ს აქციების ფასის ოთხჯერ ზრდას პროგნოზირებენ

Nvidia-ს აქციის ფასი მომდევნო ოთხ წელიწადში შესაძლოა თითქმის ოთხჯერ გაიზარდოს, თუ ხელოვნური ინტელექტის განვითარებასთან ერთად მონაცემთა ცენტრებზე ხარჯებიც მნიშვნელოვნად მოიმატებს.

ამჟამად Nvidia-ს ერთი აქცია დაახლოებით 210 დოლარი ღირს. 800 დოლარამდე გაძვირების შემთხვევაში კომპანიის საბაზრო ღირებულება 5.1 ტრილიონი დოლარიდან თითქმის 20 ტრილიონ დოლარამდე გაიზრდება.

ასეთი ზრდის მთავარი საფუძველი ხელოვნური ინტელექტისთვის საჭირო გამოთვლით სიმძლავრეზე მზარდი მოთხოვნაა. Alphabet, Amazon, Microsoft და Meta მონაცემთა ცენტრების მშენებლობასა და აღჭურვაზე ასობით მილიარდ დოლარს ხარჯავენ. Nvidia კი ამ ცენტრების მუშაობისთვის საჭირო პროცესორების ერთ-ერთ მთავარ მწარმოებლად რჩება.

Nvidia-ს პროგნოზით, 2030 წლისთვის მონაცემთა ცენტრებზე მსოფლიოში ყოველწლიურად 3-4 ტრილიონი დოლარი დაიხარჯება. შედარებისთვის, Alphabet, Amazon, Microsoft და Meta მხოლოდ 2026 წელს ამ მიმართულებით დაახლოებით 650 მილიარდი დოლარის დახარჯვას გეგმავენ.

თუ მონაცემთა ცენტრებზე ხარჯები მოსალოდნელი ტემპით გაიზრდება და Nvidia ბაზარზე საკუთარ პოზიციებს შეინარჩუნებს, კომპანიის შემოსავალი და მოგებაც შესაძლოა რამდენჯერმე გაიზარდოს. ზრდას ხელი უნდა შეუწყოს ახალი თაობის Vera Rubin-ის სისტემების გამოშვებამაც, თუმცა, Nvidia-სთვის კონკურენციაც იზრდება. მსხვილი ტექნოლოგიური კომპანიები საკუთარ ჩიპებს ქმნიან, რამაც მომავალში მისი საბაზრო წილი შესაძლოა შეამციროს. მიუხედავად ამისა, ხელოვნური ინტელექტისთვის საჭირო ტექნოლოგიებზე მოთხოვნის ზრდის ფონზე, Nvidia-ს აქციებს კვლავ მნიშვნელოვანი ზრდის შესაძლებლობა აქვს.

წყარო: Investing.com