OpenAI-მ საკუთარი AI ჩიპის Jalapeño-ს პირველი შედეგები გამოაქვეყნა
OpenAI-მა საკუთარი AI ჩიპის, Jalapeño-ს, პირველი ტესტირების შედეგები გამოაქვეყნა და განაცხადა, რომ ჩიპი როგორც ენერგოეფექტურობის, ისე დამუშავების სისწრაფის მიმართულებით მნიშვნელოვან უპირატესობას აჩვენებს კომერციულ AI აპარატურასთან შედარებით.
კომპანიამ Jalapeño InferenceX-ის საჯარო ბენჩმარკის გამოყენებით გამოსცადა და მისი შედეგები შეადარა ბაზარზე არსებულ წამყვან AI სისტემებს. ტესტირება ჩატარდა სამ მოდელზე: GPT-OSS 120B, DeepSeek R1 670B და Kimi K2.5 1T.
OpenAI-ის ინფორმაციით, Jalapeño-მ სამივე მოდელზე პიკური დატვირთვისას ერთ ვატზე 1.5-1.9-ჯერ მეტი AI სამუშაო შეასრულა, ხოლო სრული დამუშავების შეყოვნება შედარებულ სისტემებთან მიმართებით 1.7-3.6-ჯერ ნაკლები იყო. განსაკუთრებით ინტერაქტიული სამუშაოებისთვის ჩიპმა 2.1-4.1-ჯერ მაღალი წარმადობა აჩვენა.
ყველაზე დიდი საჯაროდ ტესტირებული მოდელის, Kimi K2.5 1T-ის, შემთხვევაში Jalapeño-მ დაახლოებით 1.5-ჯერ მეტი წარმადობა ერთ ვატზე და 3.4-ჯერ ნაკლები სრული შეყოვნება დააფიქსირა.
ჩიპის ნომინალური სიმძლავრე 700 ვატია, თუმცა ტესტირებისას მისი მდგრადი მოხმარება 550 ვატს არ აღემატებოდა.
OpenAI-ის განცხადებით, საკუთარი შიდა, უფრო მოწინავე AI მოდელების გამოყენებისას Jalapeño-ს უპირატესობა კიდევ უფრო იზრდებოდა, რაც შესაძლოა მიუთითებდეს, რომ მისი არქიტექტურა განსაკუთრებით ეფექტურია უფრო დიდი და რთული AI დატვირთვების შემთხვევაში.
ჩიპის შექმნის პროცესმა საწყისი დიზაინიდან საბოლოო წარმოებისთვის მომზადებამდე, ანუ tapeout-ამდე, მხოლოდ ცხრა თვე გასტანა. OpenAI-მ ჩიპის დიზაინისა და ოპტიმიზაციის პროცესშიც საკუთარი AI მოდელები გამოიყენა.
კომპანიის ინფორმაციით, Codex-ისა და GPT-Astra-ს გამოყენებით გუნდმა სამი ღია წონის მოდელი მაღალი წარმადობის დონეზე მხოლოდ ორ თვეში გადაიყვანა. კონკრეტულ GPT-OSS-ის attention და mixture-of-experts კომპონენტებში AI-ის მიერ შექმნილი იმპლემენტაციები ადამიანის მიერ დაწერილ ვერსიებზე 1.5-1.8-ჯერ სწრაფი აღმოჩნდა.
OpenAI გეგმავს Jalapeño-ს საკუთარ გამოთვლით ინფრასტრუქტურაში წლის ბოლომდე დანერგვას. ამასთან, კომპანია უკვე მუშაობს ჩიპის მეორე თაობაზე, ხოლო მესამე თაობის განვითარებაც დაწყებულია.
მიუხედავად საკუთარი ჩიპის შექმნისა, OpenAI აცხადებს, რომ Jalapeño-ს პარალელურად კვლავ გამოიყენებს Nvidia-სა და სხვა პარტნიორების AI აქსელერატორებს, როგორც მოდელების სწავლებისთვის, ისე ინფერენსისთვის.
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
