OpenAI-მ ChatGPT-ისთვის ახალი ხმოვანი მოდელი GPT-Live წარადგინა
OpenAI-მ ChatGPT-ისთვის ახალი ხმოვანი მოდელი, GPT-Live, წარადგინა, რომელიც მომხმარებელთან საუბარს უფრო ბუნებრივსა და ცოცხალს ხდის.
ახალი სისტემა სრულდუპლექსურ (full-duplex) ტექნოლოგიას იყენებს. ეს ნიშნავს, რომ მას ერთდროულად შეუძლია თქვენი მოსმენა და პასუხის გაცემა. საუბრის დროს GPT-Live ბუნებრივად რეაგირებს, საჭიროების შემთხვევაში მოკლე კომენტარს აკეთებს, სწრაფად პასუხობს ან უბრალოდ ელოდება, ვიდრე საუბარს გააგრძელებთ.
წინა ვერსიებისგან განსხვავებით, GPT-Live საუბრის მიმდინარეობისას მიღებულ ინფორმაციას მყისიერად ამუშავებს და წამში რამდენჯერმე წყვეტს, როგორ უპასუხოს მომხმარებელს. ამის წყალობით დიალოგი გაცილებით შეუფერხებლად და ბუნებრივად მიმდინარეობს. თუ მომხმარებელი უფრო რთულ დავალებას სთხოვს, მაგალითად, ინტერნეტში ინფორმაციის მოძიებას ან სიღრმისეულ ანალიზს, სისტემა GPT-5.5 მოდელს იყენებს.
მომხმარებელს ასევე შეუძლია თავად განსაზღვროს, რა სიჩქარით იმუშავოს მოდელმა. Instant სწრაფ პასუხებზეა გათვლილი, ხოლო Medium და High უფრო კომპლექსური კითხვებისა და ამოცანებისთვის არის განკუთვნილი.
GPT-Live ორ ვერსიად გამოვიდა. GPT-Live-1 ხელმისაწვდომია Go, Plus და Pro პაკეტების მომხმარებლებისთვის, ხოლო GPT-Live-1 mini ხელმისაწვდომია უფასო ვერსიის მომხმარებლებისთვის. ფუნქცია უკვე მუშაობს iOS-ისა და Android-ის აპლიკაციებში, ასევე ChatGPT-ის ვებვერსიაზე.
საუბრის დროს GPT-Live-ს ეკრანზე დამატებითი ინფორმაციის ჩვენებაც შეუძლია. მაგალითად, ამინდის პროგნოზის, აქციების ფასების ან სპორტული სიახლეების. ამ ეტაპზე მოდელს ვიდეოზარისა და ეკრანის გაზიარების მხარდაჭერა ჯერ არ აქვს, თუმცა OpenAI აცხადებს, რომ ამ შესაძლებლობების დამატებაზე უკვე მუშაობს.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
