ოქროს ფასი გაიზარდა - ინვესტორები ახლო აღმოსავლეთის ვითარებას აკვირდებიან

სამშაბათს ოქროს ფასები გაიზარდა, რადგან ინვესტორები ყურადღებით აკვირდებიან ახლო აღმოსავლეთში დაძაბულობის შემცირების მცდელობებს. Spot ოქრო 1.5%-ით, უნციაზე 4,067.55 დოლარამდე გაიზარდა, ხოლო ოქროს ფიუჩერსები 1.4%-ით, 4,072.45 დოლარამდე გამყარდა.

ბაზრის ყურადღების ცენტრში კვლავ აშშ-სა და ირანს შორის მიმდინარე მოლაპარაკებებია. Reuters-ის ინფორმაციით, ირანის მაღალჩინოსანმა განაცხადა, რომ შუამავლები 10-დღიან ცეცხლის შეწყვეტას განიხილავენ, რაც დროებით შეთანხმებას გადაარჩენს და ფართომასშტაბიანი მოლაპარაკებების გაგრძელების შესაძლებლობას შექმნის.

მიუხედავად ამისა, რეგიონში სამხედრო დაპირისპირება კვლავ გრძელდება, რაც ზრდის გაურკვევლობას ჰორმუზის სრუტის უსაფრთხოების გარშემო. აღნიშნული საზღვაო მარშრუტი გლობალური ნავთობისა და თხევადი ბუნებრივი აირის მნიშვნელოვანი ნაწილის ტრანსპორტირებას უზრუნველყოფს, ამიტომ მისი შეფერხება ინფლაციურ ზეწოლას აძლიერებს.

ანალიტიკოსები მიიჩნევენ, რომ ნავთობის ფასების ზრდამ შესაძლოა ცენტრალური ბანკები, მათ შორის აშშ-ის ფედერალური რეზერვი, საპროცენტო განაკვეთების გაზრდისკენ უბიძგოს. მაღალი განაკვეთები, როგორც წესი, უარყოფითად მოქმედებს ოქროზე, რადგან ის შემოსავალს არ იძლევა.

UBS Global Wealth Management-ის ანალიტიკოსის, დომინიკ შნაიდერის შეფასებით, მაღალი რეალური საპროცენტო განაკვეთების მოლოდინი ოქროზე ზეწოლას ინარჩუნებს, ამიტომ ინვესტორებისთვის გრძელვადიანი ხედვა კვლავ მნიშვნელოვანია.