Samsung-ის აქციები დაეცა - თანამშრომელთა პროფკავშირი გაფიცვას მაინც გეგმავს
ტექნოლოგიური გიგანტის Samsung Electronics აქციები პარასკევს 7.6%-ით დაეცა მას შემდეგ, რაც კომპანიის ყველაზე დიდმა პროფკავშირმა განაცხადა, რომ მაისის ბოლოს დაგეგმილ გაფიცვას მაინც გამართავს.
National Samsung Electronics Union-მა აღნიშნა, რომ მზად არის მოლაპარაკებები 7 ივნისის შემდეგ განაახლოს, თუმცა 21 მაისიდან დაწყებულ 18-დღიან გაფიცვაზე უარს არ ამბობს.
პროფკავშირი კომპანიისგან ბონუსების ლიმიტების გაუქმებასა და მოგებაზე დაფუძნებული ანაზღაურების სისტემის დანერგვას ითხოვს. თანამშრომლები ასევე უკმაყოფილებას გამოთქვამენ კონკურენტ SK hynix-თან შედარებით დაბალი კომპენსაციების გამო, მას შემდეგ რაც SK hynix-მა თანამშრომლებთან უფრო ხელსაყრელ ბონუსებზე შეთანხმებას მიაღწია.
Samsung-სა და პროფკავშირს შორის მთავრობის შუამავლობით მიმდინარე მოლაპარაკებები ამ კვირაში ჩაიშალა, რადგან მხარეებმა ანაზღაურებისა და ბონუსების საკითხებზე შეთანხმებას ვერ მიაღწიეს.
სამხრეთ კორეის ხელისუფლებამ, მათ შორის პრემიერ-მინისტრმა და ინდუსტრიის მინისტრმა, ორივე მხარეს მოლაპარაკებების გაგრძელებისკენ მოუწოდა. მათი შეფასებით, ფართომასშტაბიანმა გაფიცვამ შესაძლოა ქვეყნის ექსპორტზე, ფინანსურ ბაზრებსა და ეკონომიკურ ზრდაზე უარყოფითად იმოქმედოს.
Samsung-ის აქციების ვარდნის ფონზე, კომპანია მნიშვნელოვნად ჩამორჩა KOSPI ინდექსის საერთო დინამიკას.
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
