Apple-ის ჩიპებში უსაფრთხოების ხარვეზი აღმოაჩინეს

კიბერუსაფრთხოების მკვლევარებმა Apple-ის Mac კომპიუტერების ჩიპებში უსაფრთხოების ახალი პრობლემა აღმოაჩინეს, რომელმაც გარკვეულ პირობებში შესაძლოა მოწყობილობიდან კონფიდენციალური ინფორმაციის მიღება შესაძლებელი გახადოს. Wall Street Journal-ის ინფორმაციით, პრობლემა „Mythos“-ის სახელით არის ცნობილი და Apple-ის პროცესორების ტექნიკურ მოწყობას უკავშირდება. სპეციალისტების განმარტებით, პრობლემა მონაცემების წინასწარი დამუშავების მექანიზმშია, რომელიც სისტემის მუშაობის დასაჩქარებლად გამოიყენება, თუმცა მკვლევარები ამბობენ, რომ სწორედ ამ პროცესში შეიძლება შეიქმნას რისკი, რომლის საშუალებითაც კრიპტოგრაფიულ გასაღებებზე წვდომა გახდება შესაძლებელი. მათი შეფასებით, ეს შემთხვევა ჩვეულებრივი პროგრამული შეცდომისგან განსხვავდება, რადგან პრობლემა უშუალოდ ჩიპის ტექნიკურ სტრუქტურას უკავშირდება. ამის გამო მისი სრულად გამოსწორება მხოლოდ სტანდარტული პროგრამული განახლებებით რთულია. Apple-ში აცხადებენ, რომ კომპანიამ უკვე დაიწყო დამატებითი დაცვის მექანიზმებზე მუშაობა, თუმცა სპეციალისტები ვარაუდობენ, რომ უსაფრთხოების დამატებითმა ზომებმა შესაძლოა მოწყობილობების მუშაობის სიჩქარე გარკვეულწილად შეამციროს. მკვლევარები ასევე აღნიშნავენ, რომ ამ ხარვეზის გამოყენება პრაქტიკაში რთულია და მაღალ ტექნიკურ ცოდნას მოითხოვს. მიუხედავად ამისა, აღმოჩენამ კიდევ ერთხელ გააჩინა კითხვები იმ უსაფრთხოების სისტემებზე, რომლითაც Apple საკუთარ მოწყობილობებს წლების განმავლობაში გამოარჩევდა.

წყარო: Investing.com