SpaceX-მა NASA-ს $4.3-მილიარდიანი ტელესკოპი კოსმოსში გაუშვა

SpaceX-მა NASA-ს ახალი კოსმოსური ტელესკოპი, Nancy Grace Roman, ფლორიდიდან გაუშვა. 4.3 მილიარდი დოლარის ღირებულების პროექტის ფარგლებში მეცნიერები ბნელ მატერიას, ბნელ ენერგიასა და მზის სისტემის მიღმა არსებულ პლანეტებს შეისწავლიან.

ტელესკოპი კოსმოსში Falcon Heavy-ის რაკეტით გაუშვეს. ის დედამიწიდან დაახლოებით 1.6 მილიონი კილომეტრის დაშორებით განთავსდება, დაკვირვებებს კი წლის ბოლოს დაიწყებს.

Roman-ის საშუალებით მეცნიერები შეეცდებიან, უკეთ გაიგონ, როგორ ფართოვდება სამყარო და რა როლი აქვს ამ პროცესში ბნელ მატერიასა და ბნელ ენერგიას. ტელესკოპი მზის სისტემის მიღმა არსებულ პლანეტებსაც მოძებნის, მათ შორის ისეთებს, რომლებიც შესაძლოა გარკვეული ნიშნებით დედამიწას ჰგავდეს.

მისი სარკე ზომით Hubble-ის ტელესკოპისას დაახლოებით უტოლდება, თუმცა Roman-ს გაცილებით ფართო ხედვის კამერა აქვს. NASA-ს შეფასებით, ამის გამო ის ცის დიდ მონაკვეთებს Hubble-ზე დაახლოებით 1,000-ჯერ სწრაფად შეისწავლის.

ტელესკოპს დანიშნულების ადგილამდე მისასვლელად რამდენიმე თვე დასჭირდება. ამის შემდეგ დაახლოებით სამი თვის განმავლობაში მის სისტემებს შეამოწმებენ, პირველი სურათები კი 2027 წელს გამოქვეყნდება.

წყარო: Investing.com