TCS ინდოეთში $7.4-მილიარდიან AI მონაცემთა ცენტრს ააშენებს

ინდური IT კომპანია Tata Consultancy Services-ის შვილობილი HyperVault და მისი პარტნიორები ხელოვნური ინტელექტისთვის განკუთვნილი მონაცემთა ცენტრის აშენებაში 7.4 მილიარდ დოლარამდე დახარჯავენ.

კომპანიამ პროექტისთვის ჰაიდერაბადში 264 აკრი მიწა უკვე შეიძინა. ცენტრი ეტაპობრივად აშენდება და დასრულების შემდეგ მისი სიმძლავრე 1 გიგავატს მიაღწევს.

ობიექტი ხელოვნური ინტელექტის კომპანიებსა და მსხვილ ღრუბლოვან პლატფორმებს მოემსახურება. ცენტრში განთავსდება დიდი რაოდენობით სპეციალური ჩიპები, რომლებიც AI მოდელების შექმნასა და მუშაობას სჭირდება.

HyperVault-ის განცხადებით, დასრულების შემდეგ ეს ინდოეთში ხელოვნური ინტელექტისთვის შექმნილი ერთ-ერთი ყველაზე დიდი მონაცემთა ცენტრი იქნება.

TCS ბოლო პერიოდში ტრადიციული IT მომსახურების მიღმაც ფართოვდება. რამდენიმე დღით ადრე კომპანიამ Porsche-ის საკონსულტაციო და საავტომობილო ტექნოლოგიების კომპანია MHP-ის შეძენაზეც გააფორმა შეთანხმება.

მსხვილი ტექნოლოგიური კომპანიები AI-ის განვითარებისთვის სულ უფრო მეტ მონაცემთა ცენტრს აშენებენ, რადგან ახალი მოდელების მუშაობას დიდი გამოთვლითი რესურსი და ელექტროენერგია სჭირდება.

წყარო: reuters