Tesla-ს გაყიდვები გაიზარდა, თუმცა ინვესტორების ყურადღება ხელოვნურ ინტელექტზეა

Tesla-მ მეორე კვარტალში 480,126 ავტომობილი გაყიდა, რაც ანალიტიკოსების პროგნოზზე 18%-ით მეტია. ეს კომპანიისთვის 2023 წლის მესამე კვარტლის შემდეგ გაყიდვების ზრდის ყველაზე მაღალი მაჩვენებელია.

აღნიშნული Tesla-სთვის განსაკუთრებით მნიშვნელოვანია, რადგან ავტობიზნესზე მისი შემოსავლების დაახლოებით 70% მოდის. ამ მიმართულებით მიღებული შემოსავალი კომპანიას საშუალებას აძლევს, გააგრძელოს ხელოვნურ ინტელექტთან დაკავშირებული ძვირადღირებული პროექტების დაფინანსება.

Morgan Stanley-სა და Barclays-ის ანალიტიკოსები ვარაუდობენ, რომ Tesla-ს მოგება ერთ აქციაზე ადრინდელ პროგნოზზე მაღალი იქნება. მიუხედავად ამისა, ნედლეულის გაძვირების გამო ავტომობილების წარმოებიდან მიღებული მოგების წილი შესაძლოა ოდნავ შემცირდეს.

გაყიდვები კომპანიას დამატებით ფინანსურ რესურსს აძლევს ისეთი პროექტებისთვის, როგორებიცაა Robotaxi, სრულად ავტონომიური მართვის სისტემა FSD და ჰუმანოიდი რობოტი Optimus, თუმცა მხოლოდ ავტომობილების გაყიდვების ზრდა Tesla-ს აქციების ზრდისთვის საკმარისი არ იქნება.

ინვესტორებისთვის მთავარი საკითხი კვლავ ის არის, შეძლებს თუ არა კომპანია ხელოვნურ ინტელექტში ჩადებული თანხის შემოსავლად გარდაქმნას. ამ ეტაპზე Robotaxi-ს ქსელი ჯერ კიდევ მცირეა. ოსტინში კომპანია მხოლოდ 30-დან 50-მდე ავტომობილს მართავს, სხვა ქალაქებში კი მათი რაოდენობა კიდევ უფრო ნაკლებია. ამასთან, ბევრ ავტომობილს ადამიანის ზედამხედველობა კვლავ სჭირდება.

ანალიტიკოსებმა Tesla-ს აქციების სამიზნე ფასი ოდნავ გაზარდეს, თუმცა მათი შეფასება კვლავ „ნეიტრალურია“. Morgan Stanley-ს მიხედვით, 417-დოლარიანი სამიზნე ფასიდან მხოლოდ 47 დოლარი მოდის ავტობიზნესზე, დანარჩენი კი კომპანიის მომავალ ტექნოლოგიურ პროექტებს უკავშირდება.

ინვესტორები ახლა ელიან, რომ წლის ბოლომდე Tesla Robotaxi-ს ფლოტს 1 500 ავტომობილამდე გაზრდის და მომსახურებას ფენიქსში, ორლანდოსა და ლას-ვეგასშიც დაიწყებს.

წყარო: Investing.com