უზბეკეთი IT ექსპორტის 5 მილიარდ დოლარამდე გაზრდას გეგმავს
უზბეკეთი ხელოვნურ ინტელექტსა და IT სერვისებს ეკონომიკური განვითარების ერთ-ერთ მთავარ მიმართულებად განიხილავს. ქვეყნის მიზანია, 2030 წლისთვის ამ სექტორიდან მიღებული ექსპორტი 5 მილიარდ დოლარამდე გაზარდოს და საერთაშორისო ბაზარზე საკუთარი პოზიციები გააძლიეროს.
ციფრული ტექნოლოგიების მინისტრის, შერზოდ შერმატოვის განცხადებით, ბოლო წლებში სექტორი სწრაფად გაიზარდა. თუ 2017 წელს IT ექსპორტი წელიწადში მილიონ დოლარსაც ვერ აღწევდა, დღეს ეს მაჩვენებელი თითქმის მილიარდ დოლარს უახლოვდება. მინისტრის თქმით, შემდეგი ეტაპი კვალიფიციურ კადრებზე, ინვესტიციებსა და ბიზნესპროცესებში ხელოვნური ინტელექტის დანერგვაზე იქნება დამოკიდებული.
ქვეყანა ცდილობს, მაღალი ღირებულების მქონე ციფრულ მომსახურებაზე გადავიდეს. ამ პროცესში უზბეკეთი მნიშვნელოვან უპირატესობად მიიჩნევს ახალგაზრდა მოსახლეობას და ინტერნეტზე ფართო წვდომას. ქვეყანაში 9.6 მილიონი ახალგაზრდაა, ინტერნეტის ხელმისაწვდომობა კი 89%-ს აღწევს. მთავრობა უცხოური კომპანიების მოზიდვას ცდილობს, რათა მათ უზბეკეთში მომსახურების ცენტრები გახსნან და ადგილობრივი კადრები დაასაქმონ. ასეთი მოდელი კომპანიების ხარჯებს შეამცირებს და მათ ახალ ბაზრებზე გასვლას გაუმარტივებს.
განსაკუთრებული ყურადღება ექცევა ინფრასტრუქტურასა და ენერგეტიკასაც. უზბეკეთი გეგმავს, ელექტროენერგია ხელოვნური ინტელექტის მონაცემთა ცენტრების მომსახურებაშიც გამოიყენოს. ინვესტორებისთვის უკვე გათვალისწინებულია საგადასახადო შეღავათები, იაფი ელექტროენერგია და ტექნიკის იმპორტზე ბაჟის გაუქმება.
ექსპერტთა შეფასებით, უზბეკეთისთვის ყველაზე რეალური გზა გლობალურ ტექნოლოგიურ გიგანტებთან პირდაპირი კონკურენცია კი არ არის, არამედ კონკრეტული AI აპლიკაციებისა და სერვისების განვითარებაა.
წყარო: Yahoo Finance
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
