Volkswagen-ი დამატებით 50 000 სამუშაო ადგილის შემცირებას განიხილავს
Volkswagen-ი მსოფლიოში დამატებით დაახლოებით 50 000 სამუშაო ადგილის შემცირების შესაძლებლობას განიხილავს. ამის შესახებ კომპანიის აღმასრულებელმა დირექტორმა, ოლივერ ბლუმემ, თანამშრომლებისთვის გაგზავნილ შიდა მემორანდუმში განაცხადა.
ახალი შემცირებები დაემატება უკვე შეთანხმებულ 50 000 სამუშაო ადგილის გაუქმებას, რომელიც მოიცავს როგორც Volkswagen-ის, ისე მისი შვილობილი ბრენდების - Porsche-ისა და Audi-ის თანამშრომლებს.
ბლუმეს განცხადებით, კომპანიის ანალიზის მიხედვით, Volkswagen-ს კონკურენტ ავტომწარმოებლებთან შედარებით 20%-იანი ხარჯობრივი ჩამორჩენა აქვს, რის გამოც დამატებითი ოპტიმიზაცია აუცილებელი გახდა. მისი თქმით, ეს სხვაობა თეორიულად კიდევ 50 000 პოზიციის შემცირებას შეესაბამება, თუმცა საბოლოო გადაწყვეტილება ჯერ მიღებული არ არის.
„ამჟამად ყველა ბრენდის, კომპანიისა და რეგიონის მასშტაბით ვაფასებთ, რამდენად აუცილებელი და რეალისტურია დამატებითი ცვლილებების განხორციელება,“ - აღნიშნულია მემორანდუმში.
გასულ კვირას Volkswagen-მა ასევე განაცხადა, რომ რესტრუქტურიზაციის ფარგლებში მოდელების რაოდენობის დაახლოებით ნახევრამდე შემცირებას და საწარმოო სიმძლავრეების ოპტიმიზაციას გეგმავს. კომპანიაში აცხადებენ, რომ გადაწყვეტილება ჩინეთის ბაზარზე გამწვავებულ კონკურენციასა და ევროპაში ჩინური ავტომწარმოებლების მზარდ გავლენას უკავშირდება.
Volkswagen-ის ცნობით, მიმდინარე წლის პირველ კვარტალში ადმინისტრაციული ხარჯები 1 მილიარდი ევროთი შემცირდა, თუმცა კომპანიაში მიაჩნიათ, რომ ხარჯების კიდევ უფრო შესამცირებლად დამატებითი ნაბიჯებია საჭირო. მათ შორისაა საწარმოო ხარჯების შემცირება, ადმინისტრაციული ხარჯების ოპტიმიზაცია და ტექნოლოგიური განვითარების პროცესის დაჩქარება.
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
