2029 წლიდან ციფრული ევროს ამოქმედება იგეგმება
ევროკავშირში ციფრული ევროს შექმნის პროცესი ახალ ეტაპზე გადადის. პროექტის მიზანია, მოქალაქეებს ნაღდი ფულის პარალელურად გადახდის ახალი საშუალება შესთავაზოს და ევროპის საგადახდო სისტემა უცხოურ პლატფორმებზე ნაკლებად დამოკიდებული გახადოს.
ევროპარლამენტმა ციფრული ევროს პროექტს მხარი დაუჭირა. თუ საკანონმდებლო პროცესი დაგეგმილი ვადით დასრულდება, საპილოტე პროგრამა 2027-2028 წლებში დაიწყება, ხოლო ციფრული ევროს გამოყენება ფართო მასშტაბით, სავარაუდოდ, 2029 წლიდან გახდება შესაძლებელი.
ციფრული ევრო ყოველდღიური გადახდებისთვის იქნება განკუთვნილი. ის ნაღდი ფულის ჩანაცვლებას არ ითვალისწინებს და მისი დამატებითი ალტერნატივა იქნება. მომხმარებლები მას სპეციალური ციფრული საფულეების მეშვეობით გამოიყენებენ, რომლებსაც კომერციული ბანკები და საგადახდო მომსახურების კომპანიები შესთავაზებენ, ხოლო ვალუტის გამოშვებასა და სისტემის მართვას ევროპის ცენტრალური ბანკი უზრუნველყოფს.
პროექტის მიხედვით, ერთ მომხმარებელს, სავარაუდოდ, მაქსიმუმ 3 000 ევროს შენახვა შეეძლება. ამ თანხაზე საპროცენტო სარგებელი არ დაირიცხება, ხოლო ლიმიტის გადაჭარბების შემთხვევაში ზედმეტი თანხა ავტომატურად საბანკო ანგარიშზე გადაირიცხება.
ევროპის ცენტრალური ბანკი განსაკუთრებულ ყურადღებას მომხმარებელთა პირადი მონაცემების დაცვასაც უთმობს. ინტერნეტით განხორციელებული გადახდები უსაფრთხოების იმავე სტანდარტებით იქნება დაცული, რაც დღეს მოქმედ ელექტრონულ გადახდებს აქვს.
ევროკავშირში მიაჩნიათ, რომ ციფრული ევრო ევროპის ფინანსურ დამოუკიდებლობას გააძლიერებს და უცხოურ საგადახდო სისტემებზე დამოკიდებულებას შეამცირებს. ამასთან, პროექტი ფინანსური სექტორის გაციფრულების პროცესის ერთ-ერთ მნიშვნელოვან ეტაპადაც განიხილება.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
