Aehr Test Systems-ის აქციები მკვეთრად გაიზარდა: კომპანია ხელოვნური ინტელექტის ბაზარზე მკვიდრდება
როგორ მოახერხა მცირე ტექნოლოგიურმა კომპანიამ ერთ წელიწადში აქციების ღირებულების თითქმის 680%-იანი ზრდა და რა როლს ასრულებს ის ხელოვნური ინტელექტის განვითარებაში?
კომპანია Aehr Test Systems-ი ინვესტორთა ყურადღების ცენტრში მას შემდეგ მოექცა, რაც ხელოვნური ინტელექტის სწრაფი განვითარების ფონზე მის პროდუქციაზე მოთხოვნა მკვეთრად გაიზარდა. კომპანიის ძირითადი საქმე მიკროჩიპების ე.წ. „სტრეს-ტესტირებაა“. Nvidia და Broadcom მილიონობით ჩიპს უშვებენ, თუმცა მათი მცირე ნაწილი მუშაობის დაწყებიდან მალევე ფუჭდება. Aehr-ის ტექნოლოგია საშუალებას იძლევა, ჩიპები ინტენსიური დატვირთვის პირობებში შემოწმდეს, რათა ყველა შესაძლო დეფექტი თავდაპირველ ეტაპზე გამოვლინდეს. აღნიშნული კი მწარმოებლებს ხარჯების შემცირებაში ეხმარება.
ამ მიდგომამ კომპანიას დიდი ფინანსური წარმატება მოუტანა. მიმდინარე წლის მესამე კვარტალში შეკვეთების მოცულობამ 37 მილიონ დოლარს გადააჭარბა, რასაც მალევე მოჰყვა რეკორდული, 41-მილიონიანი კონტრაქტი მსხვილი კლიენტისგან. შედეგად, წლის მეორე ნახევრის ჯამურმა შეკვეთებმა 92 მილიონ დოლარს მიაღწია, რაც კომპანიის სამომავლო შემოსავლებისთვის სერიოზული წინაპირობაა.
აღსანიშნავია, რომ თუ ადრე Aehr-ი მეტწილად ელექტრომობილების ბაზარზე მუშაობდა, ამჟამად მთავარ პრიორიტეტად ხელოვნური ინტელექტი და მონაცემთა ცენტრები აქცია. ელექტრომობილების ბაზარზე მოთხოვნის შესუსტების გამო კომპანიის შემოსავლები მესამე კვარტალში 44%-ით შემცირდა, თუმცა AI სექტორიდან მიღებულმა შეკვეთებმა ვითარება შეცვალა და კომპანიას დაკარგული შემოსავლის შევსების შესაძლებლობა მისცა.
აქციების ფასისა და გაყიდვების კოეფიციენტი (P/S) საკმაოდ მაღალია და 61-ს უტოლდება, რაც ამ აქციების ფასის არასტაბილურობას განაპირობებს. შესაბამისად, Aehr-ი კვლავ მაღალი რისკის აქტივია, თუმცა მათთვის, ვინც ხელოვნური ინტელექტის ინდუსტრიის გრძელვადიან პერსპექტივას ენდობა, კომპანიის ახალი კონტრაქტები საყურადღებო სიგნალია.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
