Anthropic-მა სან-ფრანცისკოს ყურეში ბიოლოგიური კვლევებისთვის ლაბორატორია შექმნა

ხელოვნური ინტელექტის კომპანია Anthropic-მა სან-ფრანცისკოს ყურეში ფიზიკური ბიოლოგიური კვლევებისთვის ლაბორატორია შექმნა, რადგან კომპანია AI-ის გამოყენების გაფართოებას სიცოცხლის მეცნიერებებისა და მედიცინის მიმართულებით ცდილობს.

Reuters-თან საუბრისას Anthropic-ის სიცოცხლის მეცნიერებების მიმართულების ხელმძღვანელმა ერიკ კაუდერერ-აბრამსმა დაადასტურა, რომ კომპანიას ე.წ. „სველი ლაბორატორია“ აქვს — სივრცე, სადაც ფიზიკური ექსპერიმენტები ტარდება. მისი თქმით, კომპანიის ბიოლოგიური კვლევები უკვე გასცდა მხოლოდ „in silico“, ანუ კომპიუტერულ მოდელირებასა და შეფასებებს.

„ბიოლოგიის შესწავლისთვის საბოლოო ტესტი კვლავ რეალურ ლაბორატორიულ სამუშაოში ტარდება და ასე იქნება გარკვეული პერიოდის განმავლობაში“, — განაცხადა კაუდერერ-აბრამსმა Reuters-თან ინტერვიუში.

მისი თქმით, Anthropic ამ მიმართულებით როგორც საკუთარ ლაბორატორიებში, ისე გარე პარტნიორებთან მუშაობს და მიდგომა იმ პრაქტიკას ჰგავს, რომელიც ბიოტექნოლოგიურ კომპანიებშია გავრცელებული.

თუმცა, Anthropic-ის წარმომადგენელმა მოგვიანებით დააზუსტა, რომ კომპანიის ლაბორატორია უშუალოდ მედიკამენტების აღმოჩენისთვის არ გამოიყენება. კომპანიამ ლაბორატორიის საქმიანობის შესახებ დამატებითი დეტალების განმარტებაზე უარი თქვა.

Anthropic-ის ბიოლოგიურ მეცნიერებებში შესვლა კომპანიის უფრო ფართო ამბიციის ნაწილია — გამოიყენოს ხელოვნური ინტელექტი იმ დაავადებების წინააღმდეგ, რომლებსაც, მისი შეფასებით, ფარმაცევტული ინდუსტრია საკმარის ყურადღებას არ უთმობს. თუმცა ნებისმიერი სამკურნალო პროგრამის წარმატება გარანტირებული არ არის, რადგან მედიკამენტების უმეტესობა კლინიკური კვლევების ეტაპზე უსაფრთხოებისა და ეფექტიანობის მოთხოვნებს ვერ აკმაყოფილებს.

Anthropic-ის აღმასრულებელი დირექტორის, დარიო ამოდეის,თვის ეს მიმართულება ასევე პირად მნიშვნელობას ატარებს. მან ცოტა ხნის წინ გამოქვეყნებულ ესეში დაწერა, რომ დაავადებამ მამამისის სიცოცხლე იმ პერიოდში შეიწირა, როდესაც მის სამკურნალოდ ეფექტური საშუალება ჯერ არ არსებობდა, თუმცა რამდენიმე წლის შემდეგ განკურნების გზა უკვე აღმოჩნდა.

კაუდერერ-აბრამსის განცხადებით, Anthropic-ის მისიაა ძლიერი ხელოვნური ინტელექტის ისეთი გზით განვითარება, რომელიც საზოგადოებისთვის სასარგებლო იქნება. მისი თქმით, კომპანია ამ შესაძლებლობას განსაკუთრებით სიცოცხლის მეცნიერებებში ხედავს და სწორედ ეს განსაზღვრავს მის მიმდინარე საქმიანობას.

Anthropic-ის ლაბორატორიული კვლევების დაწყება ასევე აჩვენებს, რომ AI კომპანიები სულ უფრო აქტიურად ცდილობენ ხელოვნური ინტელექტის მოდელების გამოყენებას რეალურ სამეცნიერო პროცესებში — არა მხოლოდ მონაცემების ანალიზისა და კომპიუტერული სიმულაციების, არამედ ფიზიკური ექსპერიმენტების მიმართულებითაც.