Apple iPhone-ის მოდელების რაოდენობის ზრდას გეგმავს
Apple სმარტფონების ბაზარზე პოზიციების გასამყარებლად ახალ გეგმას ამზადებს. Nikkei Asia-ს ინფორმაციით, 2026 წლის მეორე ნახევრიდან 2027 წლის პირველ ნახევრამდე პერიოდში კომპანია რამდენიმე ახალი iPhone-ის გამოშვებას გეგმავს, მათ შორის იქნება პირველი დასაკეცი iPhone-იც.
Apple-ისთვის ერთ-ერთი მთავარი მიმართულება სწორედ დასაკეცი მოდელია. კომპანია ამ სეგმენტში შესვლით Samsung-სა და ჩინურ მწარმოებლებს გაუწევს კონკურენციას, რომლებიც დასაკეცი სმარტფონების ბაზარზე ამჟამად წამყვან პოზიციებს იკავებენ. არსებული ინფორმაციით, Apple-მა წარმოების სამიზნე მაჩვენებელიც გაზარდა და მომწოდებლებს 10 მილიონი ერთეულის დამზადება სთხოვა, რაც თავდაპირველ პროგნოზს აღემატება.
კომპანია პარალელურად iPhone-ის გამოშვების გრაფიკსაც ცვლის. Apple, სავარაუდოდ, პირველ რიგში პრემიუმ მოდელებს წარადგენს, ხოლო სტანდარტული iPhone-ის გამოშვება 2027 წლისთვის გადაიწევს. ამავდროულად, დღის წესრიგში დგას პროდუქციის გაძვირების საკითხიც.
მეხსიერების ჩიპებზე ფასების ზრდის გამო, Apple-მა Mac-ისა და iPad-ის რამდენიმე მოდელი უკვე გააძვირა. iPhone-ის ფასი ამ ეტაპზე უცვლელია, თუმცა თუ კომპონენტების ხარჯები კვლავ გაიზრდება, ფასების მატება მომავალ მოდელებზეც შეიძლება აისახოს.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
