Ark Invest Bitcoin-ის ფასის მნიშვნელოვან ზრდას პროგნოზირებს
საინვესტიციო კომპანია Ark Invest-ის შეფასებით, 2030 წლისთვის Bitcoin-ის ფასი შესაძლოა თითქმის 800 ათას დოლარამდე გაიზარდოს.
Cathie Wood-ის მიერ დაფუძნებული Ark Invest-ის პროგნოზით, 2030 წლისთვის Bitcoin-ის საერთო საბაზრო ღირებულებამ შესაძლოა 16 ტრილიონ დოლარს მიაღწიოს. ამ შემთხვევაში, მიმოქცევაში არსებული Bitcoin-ების რაოდენობის გათვალისწინებით, ერთი Bitcoin-ის ფასი დაახლოებით 800 ათასი დოლარი იქნება. ეს მის ამჟამინდელ ფასთან შედარებით 1 125%-იან ზრდას ნიშნავს.
კომპანია პროგნოზს რამდენიმე გარემოებას უკავშირებს. Ark Invest-ის შეფასებით, მომავალში მსხვილი საინვესტიციო ფონდები საკუთარი აქტივების ნაწილს Bitcoin-ში განათავსებენ. ამასთან, შესაძლოა გაიზარდოს მისი გამოყენება, როგორც ოქროს ალტერნატივის, განსაკუთრებით ეკონომიკური და პოლიტიკური არასტაბილურობის პერიოდში.
კომპანია ასევე ელის, რომ Bitcoin-ს საკუთარ რეზერვებში უფრო მეტი სახელმწიფო და კერძო კომპანია შეიტანს. Ark Invest-ის პროგნოზში გათვალისწინებულია Bitcoin-ის ქსელის გამოყენების ზრდაც, მათ შორის პირდაპირი ფინანსური ოპერაციების განსახორციელებლად.
თუმცა, უნდა აღინიშნოს, რომ 16-ტრილიონიანი საბაზრო ღირებულების მიღწევა ნაკლებად რეალისტური შეიძლება იყოს. ასეთი მაჩვენებელი Nvidia-ს, Apple-ისა და Alphabet-ის ამჟამინდელ საერთო ღირებულებასაც გადააჭარბებდა.
ეჭვს იწვევს Bitcoin-ის, როგორც „ციფრული ოქროს“, როლიც. 2025 წელს, როდესაც ინვესტორები უსაფრთხო აქტივებს ეძებდნენ, ოქროს ფასი 64%-ით გაიზარდა, Bitcoin-ის ღირებულება კი 5%-ით შემცირდა. შესაბამისად, Bitcoin-ს ზრდის პოტენციალი აქვს, თუმცა 2030 წლისთვის მისი ფასის 800 ათას დოლარამდე ზრდა ნაკლებად სავარაუდოა.
წყარო: Yahoo finance
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
