აშშ ჩინეთში ჩატარებულ კლინიკურ კვლევებს ამოწმებს
აშშ-ის კონგრესში ხუთი მსხვილი ფარმაცევტული კომპანიის საქმიანობის შესწავლა დაიწყეს. საქმე ეხება ჩინეთში ჩატარებულ კლინიკურ კვლევებსა და შესაძლო კავშირებს სამხედრო დაწესებულებებთან.
წარმომადგენელთა პალატის ჩინეთის საკითხთა კომიტეტი ინფორმაციას ითხოვს Merck-ის, AbbVie-ის, Eli Lilly-ის, Pfizer-ისა და Bristol Myers Squibb-ისგან. კომიტეტს აინტერესებს, ჩაატარეს თუ არა კომპანიებმა კვლევები ჩინეთის სამხედრო ჰოსპიტლებში ან სინძიანის რეგიონში.
ამერიკელი კანონმდებლების შეფასებით, ასეთ კვლევებს შეიძლება ეროვნული უსაფრთხოების რისკი ახლდეს, რადგან არსებობს საფრთხე, რომ ამერიკული სამედიცინო ტექნოლოგიები და კვლევითი ცოდნა ჩინეთის სამხედრო სექტორისთვის გახდეს ხელმისაწვდომი.
განსაკუთრებული ყურადღება სინძიანის რეგიონს ეთმობა, სადაც ადამიანის უფლებების დარღვევის შესახებ წლებია საუბრობენ. კომიტეტი ასევე ამოწმებს, იყო თუ არა კვლევებში მონაწილე პირების თანხმობა სათანადოდ მიღებული.
ჩინეთში კლინიკური კვლევების რაოდენობა ბოლო წლებში სწრაფად გაიზარდა. ამის მიზეზად დაბალი ხარჯები და სახელმწიფო მხარდაჭერა სახელდება. 2025 წელს გლობალურმა ფარმაცევტულმა კომპანიებმა ჩინურ ექსპერიმენტულ მედიკამენტებთან დაკავშირებულ გარიგებებში 138 მილიარდი დოლარი დახარჯეს.
ამ ეტაპზე კომპანიების მხრიდან დარღვევა დადგენილი არ არის. თუმცა აშშ-ში უკვე განიხილავენ ახალ წესებს, რომლებიც ჩინეთში ბიოტექნოლოგიურ ინვესტიციებსა და სალიცენზიო გარიგებებს უფრო მკაცრ შემოწმებას დაუქვემდებარებს. გამოძიების დაწყების შემდეგ ფარმაცევტული კომპანიების აქციების ფასი შემცირდა.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
