აშშ ჩინეთთან სავაჭრო შეთანხმების გაგრძელებას განიხილავს
აშშ ჩინეთთან სავაჭრო შეთანხმების გაგრძელებას განიხილავს. ამის შესახებ აშშ-ის ფინანსთა მინისტრმა სკოტ ბესენტმა ჩინეთის ვიცე-პრემიერ ჰე ლიფენთან შეხვედრის შემდეგ განაცხადა.
მოქმედ შეთანხმებას ვადა 10 ნოემბერს ეწურება. საკითხს დონალდ ტრამპი და სი ძინპინი თეთრ სახლში დაგეგმილ შეხვედრაზე განიხილავენ. ბესენტს შესაძლო ახალი შეთანხმების პირობები არ დაუკონკრეტებია, თუმცა აღნიშნა, რომ ვაშინგტონისთვის ორივე ვარიანტი მისაღებია.
არსებულმა შეთანხმებამ ქვეყნებს შორის ტარიფები შეამცირა. მანამდე საპასუხო ზომების შედეგად ზოგიერთი გადასახადი სამნიშნა ნიშნულამდე იყო გაზრდილი. ჩინეთი კრიტიკული მინერალებისა და იშვიათმიწა ლითონების მიწოდების აღდგენასაც დათანხმდა, თუმცა აშშ მიიჩნევს, რომ ეს პროცესი ძალიან ნელა მიმდინარეობს.
მოლაპარაკებების სხვა საკითხებს შორისაა ნაკლებად სტრატეგიულ საქონელზე ტარიფების შემცირება, ჩინეთის მიერ Boeing-ის თვითმფრინავებისა და ამერიკული სასოფლო-სამეურნეო პროდუქციის შეძენა, ასევე AI უსაფრთხოებასთან დაკავშირებული საკომუნიკაციო არხის შექმნა.
წყარო: Reuters
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
