აშშ ჩინური მზის ინვერტორების იმპორტის აკრძალვას განიხილავს

აშშ-ის ადმინისტრაცია ჩინური წარმოების მზის ინვერტორების იმპორტის აკრძალვას განიხილავს. გადაწყვეტილება ენერგოუსაფრთხოების რისკებს უკავშირდება და მიზნად ისახავს ელექტრომომარაგების სისტემის დაცვას შესაძლო შეფერხებებისგან. რეგულაციის საბოლოო ვერსია, სავარაუდოდ, წლის ბოლომდე მომზადდება.

ანალიტიკოსების შეფასებით, შეზღუდვების შედეგად ყველაზე ხელსაყრელ მდგომარეობაში ამერიკული კომპანიები, SolarEdge და Enphase, აღმოჩნდებიან. განსაკუთრებით საგრძნობი გავლენა მოსალოდნელია კომერციულ და სამრეწველო სეგმენტზე, სადაც ჩინურ მწარმოებლებს, მათ შორის Chint-სა და Sungrow-ს, ბაზრის დაახლოებით 40% უკავიათ.

აკრძალვის შემთხვევაში, ამერიკულ კომპანიებს ამ მიმართულებით გაფართოების მეტი შესაძლებლობა მიეცემათ.

საცხოვრებელ სექტორში მკვეთრი ცვლილებები ნაკლებად არის მოსალოდნელი, რადგან ამ ბაზრის 90%-ს უკვე Enphase, SolarEdge და Tesla აკონტროლებენ. უფრო მნიშვნელოვანი გავლენა მოსალოდნელია მასშტაბურ პროექტებზე, სადაც ჩინური Sungrow ამჟამად წამყვან პოზიციას იკავებს.

შეზღუდვების ამოქმედების შემთხვევაში, ადგილობრივ მწარმოებლებს შესაძლებლობა ექნებათ, ბაზარზე საკუთარი ტექნოლოგიები უფრო აქტიურად დანერგონ.

წყარო:Investing.com