აშშ-ის ხაზინამ ტრამპის გამოსახულებიანი ოქროს მონეტა წარადგინა
აშშ-ის ხაზინამ ქვეყნის დამოუკიდებლობის 250 წლისთავისთვის შექმნილი, დონალდ ტრამპის გამოსახულებიანი 24-კარატიანი ოქროს მონეტა წარადგინა. 1-დოლარიანი საკოლექციო მონეტის დიზაინი საზოგადოებას ხაზინის მდივანმა სკოტ ბესენტმა გააცნო. მის მოჭრას აშშ-ის ზარაფხანა საიუბილეო თარიღისთვის დაიწყებს.
მონეტაზე ტრამპის პორტრეტთან ერთად დატანილია წარწერები „In God We Trust“ და „Liberty 1776–2026“. აშშ-ის კანონმდებლობა ცოცხალი ადამიანების გამოსახვას ეროვნულ ვალუტაზე, როგორც წესი, კრძალავს, თუმცა ადმინისტრაციის განმარტებით, ეს შეზღუდვა აღნიშნულ მონეტაზე არ ვრცელდება, რადგან იგი სპეციალურად დამოუკიდებლობის 250 წლისთავისთვის მიღებული კანონის საფუძველზე შეიქმნა.
პროექტი იმ ინიციატივებს შორისაა, რომლებიც ტრამპის თეთრ სახლში დაბრუნების შემდეგ დაიწყო და სახელმწიფო სიმბოლოებსა და ოფიციალურ დოკუმენტებში მისი გამოსახულების გამოყენებას ითვალისწინებს. განხილულია ახალი პასპორტების, ეროვნული პარკების საშვებისა და 250-დოლარიანი ბანკნოტის დიზაინებიც.
წყარო: Yahoo Finance
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
