აშშ-მ ირანთან დაკავშირებული 131 მილიონი დოლარის კრიპტოაქტივები გაყინა
აშშ-მ ირანის ცენტრალურ ბანკსა და „ისლამური რევოლუციის გუშაგთა კორპუსთან“ დაკავშირებულ კრიპტოსაფულეებში 131 მილიონ დოლარზე მეტი ღირებულების აქტივები გაყინა. ოპერაცია აშშ-ის ფინანსთა სამინისტროსა და კომპანია Tether-ის თანამშრომლობით ჩატარდა.
ეს ნაბიჯი „ეკონომიკური რისხვის“ სახელით ცნობილი კამპანიის ნაწილია, რომლის ფარგლებშიც აშშ-მ ირანთან დაკავშირებული დაახლოებით 1 მილიარდი დოლარის ციფრული აქტივები უკვე დაბლოკა.
ირანი წლებია კრიპტოვალუტებს, განსაკუთრებით კი დოლარზე მიბმულ USDT-ს, სანქციების გვერდის ავლისა და საერთაშორისო გადახდებისთვის იყენებს. ამ გზით ქვეყანა ეროვნული ვალუტის გაუფასურებით გამოწვეული ზარალის შემცირებასაც ცდილობს, თუმცა ბლოკჩეინში ყველა ტრანზაქციის ისტორია ინახება, რაც სამართალდამცავებს საეჭვო გადარიცხვების აღმოჩენაში ეხმარება. ამასთან, Tether-ს, როგორც USDT-ის გამომშვებ კომპანიას, შეუძლია კონკრეტული კრიპტოსაფულეები დაბლოკოს და მათზე არსებული თანხის გამოყენება შეზღუდოს.
აშშ-ის ხაზინის მდივნის, სკოტ ბესენტის განცხადებით, ვაშინგტონი გააგრძელებს ირანის ფინანსური ოპერაციების კონტროლს, რათა რეჟიმს იარაღის შესაძენად საჭირო უკანონო თანხებზე წვდომა შეუზღუდოს.
სანქციები შეეხო იმ პირებსა და კომპანიებსაც, რომლებიც სხვადასხვა ქვეყანაში ირანისთვის იარაღის შეძენაში მონაწილეობდნენ. Tether-ის ინფორმაციით, კომპანიას სამართალდამცავ ორგანოებთან თანამშრომლობით დღემდე სხვადასხვა დანაშაულთან დაკავშირებული 4.4 მილიარდი დოლარის აქტივები აქვს გაყინული.
წყარო: Yahoo Finance
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
