აშშ-მ ცხრა კუბურ ორგანიზაციასა და სამ პირს სანქციები დაუწესა

აშშ-მ ცხრა კუბურ ორგანიზაციასა და სამ პირს სანქციები დაუწესა. ვაშინგტონის განცხადებით, ისინი კუბის ხელისუფლებას უჭერენ მხარს და შეერთებული შტატების წინააღმდეგ მიმართულ საქმიანობაში მონაწილეობენ.

სანქციები შეეხო კუბის ხალხთა მეგობრობის ინსტიტუტის (ICAP) ხელმძღვანელ პირებსა და ცხრა ორგანიზაციას, მათ შორის ქვეყნის მშენებლობის სამინისტროს.

აშშ-ის სახელმწიფო მდივნის, მარკო რუბიოს განცხადებით, ICAP შეერთებულ შტატებში მოქმედ ქსელს აფინანსებდა, რომელიც საგანმანათლებლო და კულტურული გაცვლითი პროგრამების გამოყენებით მხარდამჭერების მოძიებასა და მათთან კავშირების დამყარებას ცდილობდა. მისი თქმით, კუბამ ცოტა ხნის წინ ფიდელ კასტროს დაბადებიდან 100 წლისთავიც გამოიყენა მხარდამჭერების ჰავანაში ჩასაყვანად და ხელისუფლების წარმომადგენლებთან შესახვედრად.

ახალი სანქციები ტრამპის მაისის ბრძანებას ეფუძნება, რომელმაც კუბის ხელისუფლების წარმომადგენლების, უსაფრთხოების ძალებისა და მათი მხარდამჭერების წინააღმდეგ შეზღუდვები გაამკაცრა.

წყარო: Investing.com