AT&T-მ Corning-თან $3-მილიარდიანი კონტრაქტი გააფორმა

AT&T-მ Corning-თან მრავალწლიანი კონტრაქტი გააფორმა, რომლის ღირებულებაც $3 მილიარდს აღემატება. შეთანხმების ფარგლებში Corning ამერიკული სატელეკომუნიკაციო კომპანიისთვის ოპტიკურ ბოჭკოსა და კაბელებს დაამზადებს.

AT&T ქსელს აფართოებს, რადგან ვიდეოს, ღრუბლოვანი სერვისების, AI პროგრამებისა და ინტერნეტთან დაკავშირებული მოწყობილობების გამოყენება იზრდება.

კომპანიის მონაცემებით, ოპტიკურ ქსელში ჩართული ერთი ოჯახი ახლა საშუალოდ თვეში ერთ ტერაბაიტზე მეტ მონაცემს მოიხმარს. ეს 2016 წლის მაჩვენებელზე ხუთჯერ მეტია.

კომპანიას სურს, ათწლეულის ბოლომდე ოპტიკური ინტერნეტი 60 მილიონ მისამართზე გახდეს ხელმისაწვდომი. ამ მიზნის მიღწევაში Lumen-ის ოპტიკური ბიზნესის 5.75 მილიარდ დოლარად შეძენაც დაეხმარება.

AT&T აცხადებს, რომ მომდევნო ხუთი წლის განმავლობაში აშშ-ის საკომუნიკაციო ინფრასტრუქტურაში 250 მილიარდ დოლარზე მეტის ინვესტირებას გეგმავს. Corning-თან გაფორმებული კონტრაქტი ამ პროგრამის ნაწილია და AT&T-ს ქსელის მშენებლობისთვის საჭირო მასალების სტაბილურად მიღებაში დაეხმარება.

წყარო: Reuters