ბრიტანეთი ფინანსურ სფეროში ხელოვნური ინტელექტის რეგულირებას განიხილავს

ბრიტანეთის ფინანსური მარეგულირებელი ხელოვნური ინტელექტის გამოყენების წესების გადახედვას გეგმავს. მიზეზი ის არის, რომ სულ უფრო მეტი ადამიანი ფინანსური გადაწყვეტილებების მიღებისას ChatGPT-ის, Claude-ისა და Gemini-ის მსგავს სისტემებს იყენებს.

ბრიტანეთის ფინანსური ზედამხედველობის ორგანო (FCA) განიხილავს, უნდა გავრცელდეს თუ არა მოქმედი რეგულაციები იმ AI მოდელებზეც, რომლებიც მომხმარებლებს ფინანსურ საკითხებზე ინფორმაციას ან რეკომენდაციებს აწვდიან. უწყების განცხადებით, ბევრი მომხმარებელი ვერ აცნობიერებს, რომ ამ სერვისებზე ის სამართლებრივი დაცვა არ ვრცელდება, რომელიც რეგულირებულ ფინანსურ მომსახურებას აქვს.

კვლევის მიხედვით, მსოფლიოში ფინანსური კომპანიების 81% უკვე იყენებს ხელოვნურ ინტელექტს, ხოლო მათი 40% ტექნოლოგიის დანერგვის უფრო მოწინავე ეტაპზეა. ბრიტანეთში AI-ს სულ უფრო ხშირად იყენებენ მომხმარებელთა მომსახურებაში, საჩივრების განხილვასა და საინვესტიციო რეკომენდაციების მომზადებაში.

FCA ყურადღებას შესაძლო რისკებზეც ამახვილებს. მარეგულირებელი მიიჩნევს, რომ თუ ფინანსური სექტორი რამდენიმე მსხვილ ტექნოლოგიურ კომპანიაზე ზედმეტად იქნება დამოკიდებული, ამან მთელი სისტემის სტაბილურობაზე შეიძლება გავლენა მოახდინოს. სწორედ ამიტომ, უწყება მომდევნო 3-6 თვის განმავლობაში გადაწყვეტს, გავრცელდება თუ არა ახალი რეგულაციები ხელოვნური ინტელექტის იმ მოდელებზე, რომლებიც დღეს ფინანსური ზედამხედველობის ფარგლებს გარეთ მოქმედებენ.

წყარო: Investing.com