ჩინეთმა აშშ-ის სავაჭრო პრაქტიკის შესახებ ორი გამოძიება სამი თვით გაახანგრძლივა

ჩინეთის კომერციის სამინისტრომ აშშ-ის სავაჭრო პრაქტიკის შესახებ ორი გამოძიების ვადა სამი თვით გაახანგრძლივა. გამოძიებები, რომლებიც მარტში დაიწყო, თავდაპირველი გეგმით ექვს თვეში უნდა დასრულებულიყო, თუმცა მათი დასრულების ვადა ახლა 27 დეკემბრამდე გადაიწია. სამინისტროს განცხადებით, გადაწყვეტილების მიზეზი საქმეების სირთულეა.

ორი გამოძიება 27 მარტს დაიწყო და აშშ-ის სავაჭრო პოლიტიკისა და იმ ზომების შესწავლას ითვალისწინებს, რომლებიც, ჩინეთის შეფასებით, გლობალურ მიწოდებისა და სამრეწველო ჯაჭვებს არღვევს და მწვანე პროდუქტებით ვაჭრობას აფერხებს. ჩინეთის სავაჭრო დაცვის ოფიციალურ ბაზაში ორივე საქმე ამჟამად მიმდინარე გამოძიებადაა მითითებული.

გამოძიებების გახანგრძლივების გადაწყვეტილება ჩინეთსა და აშშ-ს შორის ბოლო სავაჭრო მოლაპარაკებებიდან რამდენიმე დღეში გამოცხადდა. მხარეები სავაჭრო ზავის ორი თვით, 10 იანვრამდე გაგრძელებაზე და ჯამში 60 მილიარდი დოლარის ღირებულების საქონელზე ტარიფების შემცირებაზე შეთანხმდნენ.

ჩინეთის მიერ დაწყებული გამოძიებები აშშ-ის მიერ ე.წ. Section 301-ის ფარგლებში წარმოებული გამოძიებების საპასუხო ნაბიჯად განიხილება. ვაშინგტონის კვლევები, მათ შორის, იძულებით შრომასა და ჭარბ საწარმოო სიმძლავრეებთან დაკავშირებულ საკითხებს ეხება.

მიუხედავად იმისა, რომ ბოლო მოლაპარაკებებმა ორ ქვეყანას შორის სავაჭრო დაძაბულობის შემცირების გარკვეული შესაძლებლობა შექმნა, მიმდინარე გამოძიებების გაგრძელება მიუთითებს, რომ ვაშინგტონსა და პეკინს შორის რიგ სავაჭრო საკითხებზე უთანხმოება კვლავ რჩება.