ჩინეთში ელექტროენერგიის წარმოებაში ქვანახშირის წილი პირველად 50%-ზე დაბალია

ჩინეთში ელექტროენერგიის წარმოებაში ქვანახშირის წილი პირველად 50%-ზე ნაკლებია. 2026 წლის პირველ ნახევარში ამ მაჩვენებელმა 49.7% შეადგინა, რაც განახლებადი ენერგიის სწრაფ ზრდას უკავშირდება.

ქვეყნის ენერგეტიკის ეროვნული ადმინისტრაციის მონაცემებით, 2016 წელს ქვანახშირზე ჩინეთის ელექტროენერგიის 65.5% მოდიოდა. ამავე პერიოდში განახლებადი ენერგიის წილი 41.2%-მდე გაიზარდა და პირველად გადააჭარბა 40%-ს.

ქარისა და მზის ენერგიაზე ელექტროენერგიის წარმოების 24.6% მოდიოდა, მაშინ როდესაც 2020 წელს მათი წილი მხოლოდ 9.7% იყო. დანარჩენი ელექტროენერგია ძირითადად ბუნებრივი აირისა და ატომური ენერგიისგან მიიღება.

მიუხედავად ამისა, ვარაუდობენ, რომ ქვანახშირის საერთო მოხმარება წელს მაინც შეიძლება გაიზარდოს. მიზეზი ელექტროენერგიაზე მოთხოვნის ზრდაა, რასაც ელექტრომობილების გავრცელება, ხელოვნური ინტელექტის მონაცემთა ცენტრების მშენებლობა და ექსპორტის გაფართოება უწყობს ხელს.

ჩინეთი კვლავ მნიშვნელოვნად არის დამოკიდებული ქვანახშირზე. შედარებისთვის, 2025 წელს აშშ-ში ქვანახშირზე ელექტროენერგიის წარმოების 17% მოდიოდა, ბუნებრივ აირზე კი 41%. ინდოეთში ქვანახშირისა და ლიგნიტის წილი გასულ წელს 69% იყო.

გასულ წელს ჩინეთში ქვანახშირის იმპორტმა თითქმის 500 მილიონი ტონა შეადგინა, ხოლო შიდა წარმოებამ 4.83 მილიარდ ტონას მიაღწია. იმპორტზე მოთხოვნის შემცირებამ შესაძლოა გავლენა მოახდინოს ჩინეთის მთავარ მომწოდებლებზე, მათ შორის ინდონეზიაზე, მონღოლეთზე, ავსტრალიასა და რუსეთზე.

წყარო: Investing.com