DeepSeek შიდა მონღოლეთში მონაცემთა ცენტრს ააშენებს

ჩინური ხელოვნური ინტელექტის კომპანია DeepSeek მონღოლეთის შიდა ავტონომიურ რეგიონში ერთგიგავატიანი მონაცემთა ცენტრის მშენებლობას გეგმავს. Bloomberg-ის ინფორმაციით, პროექტი კომპანიას სილიკონის ველის წამყვან ხელოვნური ინტელექტის მოდელებთან კონკურენციაში დაეხმარება.

ობიექტი ქალაქ ულანქაბში, პეკინიდან დაახლოებით 350 კილომეტრში განთავსდება. DeepSeek საკუთარი ინფრასტრუქტურის აშენებასთან ერთად, დამატებითი სიმძლავრის სხვა კომპანიებისგან იჯარით აღებასაც გეგმავს.

ადგილობრივი ხელისუფლების მიერ გაცემული ნებართვების მიხედვით, ულანქაბში მონაცემთა ცენტრების პროექტებზე ათზე მეტი კომპანია მუშაობს. DeepSeek-ს სურს, ობიექტის ნაწილი 2027 წლის ბოლომდე ან 2028 წლის დასაწყისში აამოქმედოს.

ჯერ უცნობია, რომელ ჩიპებს გამოიყენებს კომპანია. ხელოვნური ინტელექტის მონაცემთა ცენტრებში ძირითადად Nvidia-ს პროცესორებია გავრცელებული, თუმცა ჩინეთში ამ მიმართულებით Huawei-ს პოზიციებიც ძლიერდება.

წყარო: Investing.com