Diamondback Energy Double Eagle-ის აქტივების შეძენას გეგმავს

ამერიკული ენერგოკომპანია Diamondback Energy ტეხასური ნავთობმომპოვებელი კომპანიის, Double Eagle-ის აქტივების დაახლოებით 5 მილიარდ დოლარად შეძენასთან ახლოსაა. ამის შესახებ Financial Times-ი ინფორმირებულ წყაროებზე დაყრდნობით წერს.
გარიგება Double Eagle V-ის შეძენას გულისხმობს. აღნიშნულ კომპანიას კერძო საინვესტიციო ფირმა EnCap Investments უჭერს მხარს. გამოცემის ინფორმაციით, შეთანხმება შესაძლოა, მომდევნო კვირაში გამოცხადდეს და როგორც ნაღდი ფულით, ისე აქციებით ანგარიშსწორებას მოიცავდეს.
Diamondback Energy-ს, Double Eagle-სა და EnCap Investments-ს ინფორმაციის კომენტირების თხოვნაზე ჯერჯერობით პასუხი არ გაუციათ.
პოტენციური შენაძენი Diamondback-ის მიერ გასულ კვირას გამოცხადებულ კიდევ ერთ შეთანხმებას მოჰყვება. კომპანიამ კერძო საინვესტიციო ფირმა KKR-თან მიაღწია შეთანხმებას, რომლის მიხედვითაც Permian-ის აუზში მოქმედი წყლის ინფრასტრუქტურის კომპანია Deep Blue Midland Basin-ის 70%-იან წილს შეიძენს.
ტეხასის შტატის ქალაქ მიდლენდში დაფუძნებული Diamondback Energy Permian-ის აუზში, რომელიც დასავლეთ ტეხასსა და ნიუ-მექსიკოს მოიცავს, პოზიციების გაძლიერებას განაგრძობს. 2024 წელს კომპანიამ კონკურენტი Endeavor Energy Partners 26 მილიარდ დოლარად შეიძინა, რის შედეგადაც რეგიონში ნავთობის მოპოვების მოცულობით მესამე უმსხვილესი მწარმოებელი გახდა.
აღსანიშნავია, რომ Diamondback-მა Double Eagle-ის გარკვეული აქტივები ჯერ კიდევ 2025 წლის თებერვალში შეიძინა. მაშინ გარიგების ღირებულებამ ნაღდი ფულისა და აქციების სახით 4.08 მილიარდი დოლარი შეადგინა.
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.





