Evonik-მა BASF-ის $11.7-მილიარდიანი შეთავაზება უარყო

გერმანულმა Evonik-მა BASF-ის 10.3 მილიარდი ევროს, დაახლოებით 11.7 მილიარდი დოლარის შეთავაზება უარყო. BASF Evonik-ის თითო აქციაში დაახლოებით 22.15 ევროს იხდიდა. მოლაპარაკებების შესახებ ინფორმაციის გავრცელებამდე Evonik-ის აქცია 18.07 ევრო ღირდა, ორშაბათის ბოლოს კი მისი ფასი 19.84 ევრო იყო.

ცნობისთვის, Evonik სპეციალურ პლასტმასებს, ცხოველთა საკვების დანამატებსა და საღებავებისა და საყოფაცხოვრებო პროდუქციისთვის საჭირო ინგრედიენტებს აწარმოებს.

Evonik-ის შეძენა BASF-ს ხარჯების შემცირებაში, მომხმარებლებთან უშუალო კავშირის გაძლიერებასა და ევროპის ბაზარზე დამოკიდებულების შემცირებაში დაეხმარებოდა.

Evonik-ის შეძენით BASF გლობალურ ბაზარზე საკუთარ პოზიციებსაც გაიმყარებდა. გასულ წელს BASF-ის შემოსავალმა 59.7 მილიარდ ევროს მიაღწია და თითქმის გაუტოლდა Sinopec-ის ქიმიური ბიზნესის მაჩვენებელს.

ჯერ უცნობია, გააგრძელებს თუ არა BASF მოლაპარაკებებს ან გაზრდის თუ არა შეთავაზებულ ფასს.

წყარო: Reuters