ევროკავშირი რუსულ ნავთობზე ფასის ლიმიტის შენარჩუნებას განიხილავს

ევროკავშირი რუსულ ნავთობზე მოქმედი ფასის ლიმიტის დროებით შენარჩუნებას განიხილავს. მიზეზი ახლო აღმოსავლეთში მიმდინარე კონფლიქტია, რომელმაც ენერგეტიკულ ბაზარზე გაურკვევლობა გაზარდა.

მოქმედი წესით, რუსულ ნავთობზე დაწესებული ფასის ლიმიტი ყოველ ექვს თვეში ერთხელ ახლდება და Urals-ის საშუალო საბაზრო ფასზე 15 პროცენტით დაბალ ნიშნულზე დგინდება. ამჟამად ეს ლიმიტი ერთ ბარელზე 44.10 დოლარია. თუ რუსული ნავთობი ამ ფასზე ძვირად იყიდება, ევროპულ კომპანიებს ეკრძალებათ მის ტრანსპორტირებასა და დაზღვევაში მონაწილეობა. ზაფხულში ლიმიტის ახალი მაჩვენებელი უნდა განისაზღვროს, თუმცა ევროკავშირში ამჟამად განიხილავენ, დარჩეს თუ არა ის დროებით უცვლელი. დიპლომატების განხილვაშია რამდენიმე ვარიანტი: არსებული ფასის შენარჩუნება, წლის ბოლომდე ავტომატური ცვლილების შეჩერება ან ლიმიტის 60 დოლარამდე გაზრდა, რათა ის G7-ის წესებთან უფრო ახლოს იყოს. საბოლოო გადაწყვეტილება რუსეთის წინააღმდეგ სანქციების 21-ე პაკეტში უნდა შევიდეს, რომლის დამტკიცებასაც ევროკავშირი ივნისის დასაწყისში გეგმავს.

წყარო: Investing.com