ევროკავშირში ჩინურ ამანათებზე გადასახადი დაწესდა

ევროკავშირში ჩინური ონლაინ პლატფორმებიდან გამოწერილი ამანათები გაძვირდება. ახალი წესით, Shein-იდან, Temu-დან და AliExpress-იდან გაგზავნილ დაბალფასიან ამანათებზე დამატებითი გადასახადი დაწესდება.

ევროკავშირმა გადაწყვიტა, დაბალფასიან ამანათებზე, რომლებიც აქამდე საბაჟო გადასახადისგან თავისუფლდებოდა, 3-ევროიანი მოსაკრებელი დააწესოს. ცვლილება ძირითადად ჩინურ ონლაინ პლატფორმებს შეეხება, საიდანაც ევროპაში დიდი რაოდენობით იაფი პროდუქცია შედის.

გადაწყვეტილების ერთ-ერთი მიზეზი ამანათების მკვეთრი ზრდაა. ევროკავშირში უბაჟოდ შესული გზავნილების რაოდენობა 2022 წელს 1.4 მილიარდი იყო, 2025 წელს კი 5.8 მილიარდამდე გაიზარდა. ბრიუსელში მიიჩნევენ, რომ ძველი შეღავათი მასობრივად გამოიყენებოდა და ევროპულ კომპანიებს არათანაბარ პირობებში აყენებდა.

ახალი წესით, 3 ევრო დაერიცხება ამანათში შემავალ თითოეულ საბაჟო კატეგორიას. მაგალითად, თუ ერთ ამანათში სამი სხვადასხვა ტიპის ნივთია, გადასახადი 9 ევრო იქნება. სპეციალისტების შეფასებით, ეს პროდუქციის ფასზეც აისახება, რადგან ონლაინ პლატფორმები დამატებითი ხარჯის ნაწილს, სავარაუდოდ, მომხმარებლებზე გადაიტანენ.

ონლაინ მაღაზიები ცვლილებებისთვის უკვე ემზადებიან. Shein ევროპაში საწყობებს აფართოებს, რათა პროდუქცია დიდი პარტიებით შეიტანოს და ხარჯები შეამციროს. AliExpress კი მომხმარებლებს წინასწარ აჩვენებს, შედის თუ არა ნივთის ფასში საბაჟო გადასახადი. 3-ევროიანი მოსაკრებელი დროებითი ზომაა და 2028 წლიდან უფრო დეტალური სატარიფო წესებით შეიცვლება.

წყარო: Investing.com