Fed-ის შეფასებით, ხელოვნურ ინტელექტზე გაზრდილი ხარჯები და ნავთობის გაძვირება ინფლაციურ წნეხს გააძლიერებს

აშშ-ში ფასების ზრდა მომდევნო თვეებშიც პრობლემად დარჩება. ფედერალური სარეზერვო სისტემის მმართველის, ლიზა კუკის თქმით, ამის ერთ-ერთი მიზეზი ხელოვნურ ინტელექტთან დაკავშირებულ ტექნოლოგიებსა და მონაცემთა ცენტრებზე გაზრდილი მოთხოვნაა. გავლენას ახდენს ნავთობის გაძვირებაც.

კუკის შეფასებით, საპროცენტო განაკვეთების კიდევ გაზრდის აუცილებლობა ჯერ არ იკვეთება. Fed-ის შემდეგი ნაბიჯები ინფლაციისა და დასაქმების ახალ მონაცემებზე, ასევე უკვე მიღებული ზომების შედეგებზე იქნება დამოკიდებული. კუკის შეფასებით, აშშ-ის შრომის ბაზარი ჯერ კიდევ საკმარისად ძლიერია მაღალი საპროცენტო განაკვეთების პირობებში.

Fed-მა სექტემბერში საპროცენტო განაკვეთი სამი წლის განმავლობაში პირველად გაზარდა და გადაწყვეტილებას კუკმაც დაუჭირა მხარი. ცენტრალური ბანკის წევრების პროგნოზებით, წლის ბოლომდე განაკვეთი შესაძლოა კიდევ ერთხელ გაიზარდოს.

აგვისტოში წლიურმა ინფლაციამ დაახლოებით 3.8% შეადგინა, რაც Fed-ის 2%-იან მიზანს მნიშვნელოვნად აღემატება. კუკის თქმით, ფასების ზრდაზე გავლენას მოახდენს როგორც ხელოვნურ ინტელექტთან დაკავშირებულ პროექტებზე გაზრდილი მოთხოვნა, ისე ახლო აღმოსავლეთში მიმდინარე კონფლიქტის გამო ენერგიის გაძვირება და მიწოდების შეფერხებები.

წყარო: Reuters