Google-ს Gemini-ის საავტორო უფლებებთან დაკავშირებით ევროპაში სამართლებრივი გამოწვევა ემუქრება

Google-მა ევროპაში მნიშვნელოვანი სამართლებრივი გამოწვევა მიიღო მას შემდეგ, რაც ევროკავშირის უმაღლესი სასამართლოს მრჩეველმა გამომცემლების საჩივარს მხარი დაუჭირა. დავა კომპანიის ხელოვნური ინტელექტის ჩატბოტ Gemini-ს მიერ ინტერნეტმომხმარებლების კითხვებზე პასუხის გასაცემად საავტორო უფლებებით დაცული სტატიების გამოყენებას ეხება.

საქმე ასახავს მზარდ დაპირისპირებას მედია გამომცემლებსა და მსხვილ ტექნოლოგიურ პლატფორმებს შორის. გამომცემლები მიიჩნევენ, რომ AI ჩატბოტები მათ ჟურნალისტურ მასალებს სათანადო ანაზღაურების გარეშე იყენებენ. ამასთან, ხელოვნური ინტელექტის მიერ მომზადებული ახალი ამბების შეჯამებები სულ უფრო ხშირად ანაცვლებს ტრადიციული საძიებო სისტემების შედეგებს, რომლებიც მომხმარებლებს მედიასაშუალებების ვებგვერდებზე გადასვლის შესაძლებლობას აძლევს. შედეგად, ონლაინგამოცემები მკითხველთა ტრაფიკს კარგავენ. საკითხმა უკვე გამოიწვია საჩივრები ევროკავშირისა და ცალკეული წევრი ქვეყნების კონკურენციის მარეგულირებელ ორგანოებში.

საქმეს ევროკავშირის მართლმსაჯულების სასამართლოს გენერალური ადვოკატი, მაჩეი შპუნარი განიხილავს. დავა უნგრულმა ვებგვერდის ოპერატორმა Like Company-მ აშშ-ში დაფუძნებული Google-ის წინააღმდეგ წამოიწყო.

შპუნარის შეფასებით, როდესაც დიდი ენობრივი მოდელის (LLM) მქონე ჩატბოტი გამომცემლის ვებგვერდიდან სტატიას იღებს, მის შინაარსს პასუხის შესაქმნელად ხელახლა იყენებს და მომხმარებელს აწვდის, გარკვეულ გარემოებებში შესაძლოა გამომცემლის საავტორო უფლებები ირღვეოდეს.

მისი განმარტებით, Gemini-ის მიერ მასალის გამოყენება გამომცემლის რეპროდუქციის უფლებას შეიძლება შეეხოს იმ შემთხვევებში, როდესაც ჩატბოტი ფასიან კონტენტზე წვდომას ე.წ. paywall-ის ან სხვა ტექნიკური შეზღუდვების უკანონო გვერდის ავლით იღებს, ან სტატიის ტექსტს ისე იყენებს, რომ მისი ორიგინალური ფორმულირებები ამოსაცნობი რჩება.

ამასთან, შპუნარმა განმარტა, რომ საავტორო უფლებები არ იცავს სტატიებში გადმოცემულ ფაქტებს, არამედ მხოლოდ ინფორმაციის გამოხატვის კონკრეტულ ფორმას.

თუმცა გენერალურმა ადვოკატმა ერთმანეთისგან გამიჯნა ჩატბოტების მიერ სტატიების პასუხებში გამოყენება და ხელოვნური ინტელექტის მოდელების სწავლება. მისი აზრით, საავტორო უფლებებით დაცული მასალების გამოყენება დიდი ენობრივი მოდელების გასაწვრთნელად ევროკავშირის ტექსტისა და მონაცემთა მოპოვების გამონაკლისით დაშვებულია.

ევროკავშირის მართლმსაჯულების სასამართლო, რომელიც გენერალური ადვოკატების არავალდებულ სარეკომენდაციო დასკვნებს უმეტეს შემთხვევაში ითვალისწინებს, საბოლოო გადაწყვეტილებას უახლოეს თვეებში გამოიტანს. Google-ის წინააღმდეგ გადაწყვეტილებამ შესაძლოა კომპანიას მსგავსი კონტენტის გამოყენებისთვის საფასურის გადახდა დააკისროს და ონლაინგამომცემლებს დამატებითი შემოსავლის წყარო გაუჩინოს.

Google-ის წარმომადგენლის განცხადებით, ევროკავშირის კანონმდებლობით გათვალისწინებული ტექსტისა და მონაცემთა მოპოვების გამონაკლისები ევროპაში კონკურენტუნარიანობისა და ხელოვნური ინტელექტის განვითარებისათვის მნიშვნელოვანია. კომპანიამ ასევე აღნიშნა, რომ გენერალური ადვოკატის პოზიცია ადასტურებს AI მოდელების საჯაროდ ხელმისაწვდომ ინფორმაციაზე გაწვრთნის კანონიერებას.

Google-ის განმარტებით, Gemini ენობრივ კანონზომიერებებს სწავლობს და ორიგინალურ პასუხებს ქმნის, ნაცვლად იმისა, რომ არსებული მასალა პირდაპირ გაიმეოროს. კომპანიის თქმით, გამომცემლებს ასევე აქვთ კონტენტის გამოყენების კონტროლისა და AI სისტემებიდან საკუთარი მასალების ამოღების შესაძლებლობა.