Google-ი კინოსტუდია A24-ის წილს ყიდულობს და ხელოვნური ინტელექტის კვლევას იწყებს

ტექნოლოგიური გიგანტი Google-ი და დამოუკიდებელი კინოსტუდია A24 ხელოვნური ინტელექტის სფეროში ერთობლივ კვლევით პროექტს იწყებენ. Wall Street Journal-ის ინფორმაციით, Google-ს სტუდიაში 75 მილიონი დოლარის ინვესტიცია შეაქვს - ეს პირველი შემთხვევაა, როდესაც კომპანია კინოსტუდიის თანამფლობელი ხდება. ამ პარტნიორობის ფარგლებში, Google-ის ქვედანაყოფი DeepMind და A24 ერთობლივად შექმნიან პროგრამულ უზრუნველყოფას, რომელიც ფილმების წარმოებასა და დისტრიბუციას გაამარტივებს.

გაფორმებული შეთანხმების მიხედვით, ტექნოლოგიურ გიგანტს A24-ის ფილმებისა და სერიალების არქივზე წვდომა არ ექნება. მხარეები განმარტავენ, რომ მათი მიზანი არა გენერაციული ხელოვნური ინტელექტის (AI) შექმნაა, რომელიც რეჟისორებში დიდ უკმაყოფილებას იწვევს, არამედ ისეთი დამხმარე ხელსაწყოების განვითარება, რომლებიც ხელოვანებს შემოქმედებით თავისუფლებასა და კონტროლს შეუნარჩუნებს. მაგალითად, სტუდიის ტექნოლოგიური ლაბორატორია (A24 Labs) უკვე მუშაობს ვიზუალური დაგეგმარების (storyboarding) ხელსაწყოზე. ეს პროგრამა რეჟისორებს გადაღების პროცესში მოსალოდნელი ტექნიკური ხარვეზების წინასწარ განსაზღვრაში დაეხმარება.

ეს ნაბიჯი Google-ის კინოინდუსტრიაში დამკვიდრების კიდევ ერთი მცდელობაა, რასაც მანამდე Sundance-ის ინსტიტუტის მხარდაჭერა და ახალი ვიზუალიზაციის ხელსაწყოების პრეზენტაციაც მოწმობდა. მიუხედავად ამისა, ჰოლივუდში ხელოვნური ინტელექტის გამოყენების ირგვლივ დებატები კვლავ აქტიურად გრძელდება, რადგან დარგის ბევრი წარმომადგენელი ამ ტექნოლოგიას მაინც სკეპტიკურად უყურებს.

წყარო: Yahoo Finance