JPMorgan-მა Nike-ის აქციების რეკომენდაცია შეამცირა
JPMorgan-მა Nike-ის აქციების შეფასება Neutral-დან Underweight-მდე შეამცირა და სამიზნე ფასი 47 დოლარიდან 40 დოლარამდე დაიყვანა. ბანკის შეფასებით, კომპანიის მიმდინარე სტრატეგიული ცვლილებები მოსალოდნელზე უფრო დიდხანს მოახდენს ზეწოლას ფინანსურ შედეგებზე.
ანალიტიკოს მეთიუ ბოსის განცხადებით, Nike-ის პროგრამა "Win Now" მოგებაზე გავლენას 2027 ფინანსური წლის მეორე ნახევარსა და 2028 ფინანსურ წელსაც მოახდენს.
JPMorgan განსაკუთრებით ორ მიმართულებას გამოყოფს:
ჩინეთში 2027 წლის იანვრიდან ონლაინ პლატფორმის რესტრუქტურიზაცია, რაც კომპანიის შეფასებით, რეგიონში წლიურად 1 მილიარდ დოლარზე მეტი შემოსავლის დაკარგვას გამოიწვევს. ჩრდილოეთ ამერიკაში მაღაზიების დახურვის პროგრამა, რომელიც გაყიდვებზე უარყოფით გავლენას 2028 ფინანსური წლის პირველ ნახევარშიც შეინარჩუნებს.
ამ ფონზე, JPMorgan-მა 2027 ფინანსური წლის EPS-ის პროგნოზი 1.55 დოლარამდე შეამცირა, რაც ბაზრის კონსენსუსზე დაახლოებით 10%-ით დაბალია, ხოლო 2028 წლის პროგნოზი 1.72 დოლარამდე დაიყვანა, რაც კონსენსუსს დაახლოებით 20%-ით ჩამორჩება. ბანკის შეფასებით, 2028 წელი ზრდის ნაცვლად სტაბილიზაციის წელი იქნება.
JPMorgan ასევე აღნიშნავს, რომ სპორტული ტანსაცმლისა და ფეხსაცმლის გლობალური ბაზარი თანდათან მომწიფებულ კატეგორიად ყალიბდება, რის გამოც ჩრდილოეთ ამერიკის ბაზრის ზრდის მოლოდინი 3%-მდე შეამცირა. ამასთან, ბანკი ელოდება, რომ Nike ნოემბერში დაგეგმილ ინვესტორთა დღეზე 2030 ფინანსურ წლამდე ორმაგნიშნა საოპერაციო მარჟის მიღწევის სამწლიან გეგმას წარადგენს.
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
