ხელოვნური ინტელექტზე გაზრდილი ხარჯები ინვესტორებში კითხვებს აჩენს
ტექნოლოგიური კომპანიები ხელოვნური ინტელექტის განვითარებისთვის ასეულობით მილიარდ დოლარს ხარჯავენ. ბაზარზე კი სულ უფრო ხშირად ისმის კითხვა, როდის გადაიქცევა ეს ხარჯები რეალურ მოგებად.
Alphabet, Amazon, Meta და Microsoft წელს ხელოვნური ინტელექტისთვის საჭირო მონაცემთა ცენტრებსა და სხვა ტექნიკურ რესურსებზე ჯამში დაახლოებით 720 მილიარდი დოლარის დახარჯვას გეგმავენ. ხარჯების მასშტაბი ძალიან დიდია. მაგალითად, Alphabet-ის საინვესტიციო ბიუჯეტი 190 მილიარდ დოლარს აღწევს, Amazon კი ამ მიმართულებით 200 მილიარდ დოლარამდე ხარჯავს. მსგავსი გეგმები აქვს SpaceX-საც, რომელიც ხელოვნური ინტელექტისთვის საჭირო მონაცემთა ცენტრების კოსმოსში განთავსებასაც განიხილავს.
ამ ფონზე ინვესტორებში კითხვები გაჩნდა. მთავარი საკითხია, შეძლებს თუ არა ხელოვნური ინტელექტი იმდენი შემოსავლისა და პროდუქტიულობის შექმნას, რომ ეს ხარჯები გამართლდეს. სწორედ ამ ეჭვებმა ბოლო პერიოდში ზეწოლა მოახდინა Amazon-ის, Alphabet-ის, Nvidia-სა და ჩიპების სხვა მწარმოებლების აქციებზე.
ანალიტიკოსების ნაწილი მიიჩნევს, რომ აქციების ვარდნა დროებითია და ინვესტორები უბრალოდ ბოლო წლების ძლიერი ზრდის შემდეგ მოგების ნაწილს იღებენ. სპეციალისტების ნაწილი შიშობს, რომ თუ მონაცემთა ცენტრები და ტექნიკური რესურსები ძალიან სწრაფად გაიზრდება, ბაზარზე ჭარბი სიმძლავრე გაჩნდება. ასეთ შემთხვევაში ფასები შეიძლება შემცირდეს, რაც კომპანიების შემოსავალზეც აისახება. ამ ვითარებაში ანალიტიკოსები ინვესტორებს ურჩევენ, მხოლოდ ხელოვნური ინტელექტის სექტორზე არ იყვნენ დამოკიდებული და კაპიტალი სხვა მიმართულებებშიც გადაანაწილონ, მათ შორის ჯანდაცვის სექტორში.
წყარო: Yahoo Finance
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
