McDonald’s-ის აქციების ფასი შემცირდა

მიმდინარე წელს McDonald’s-ის აქციების ფასი დაახლოებით 11%-ით შემცირდა და ბოლო ორი წლის განმავლობაში ყველაზე დაბალ ნიშნულს მიუახლოვდა. საინტერესოა, რომ ეს კლება კომპანიის სტაბილური ფინანსური შედეგების ფონზე ფიქსირდება, თუმცა ინვესტორებში სამომხმარებლო განწყობის გაუარესება გარკვეულ კითხვებს აჩენს.

ბოლო სამი წლის განმავლობაში McDonald’s-ის გაყიდვები საშუალოდ 5%-ზე მეტით იზრდებოდა, ხოლო ბოლო კვარტალში ამ მაჩვენებელმა 9%-ს მიაღწია, რაც იმაზე მიუთითებს, რომ კომპანიის ძირითადი ბიზნესი მყარად მუშაობს. მიუხედავად ამისა, ბაზრის მთავარი ყურადღება ახლა მაინც მომხმარებელთა ხარჯების შემცირებაზეა მიმართული — სუსტმა სამომხმარებლო განწყობამ, შესაძლოა, მოკლევადიან პერსპექტივაში რესტორნების სექტორზე უარყოფითად იმოქმედოს.

გარდა ამისა, McDonald’s თავის ინვესტორებს დივიდენდებსაც უხდის. ამჟამად დივიდენდური სარგებელი 2.7%-ს შეადგენს, რაც S&P 500-ის საშუალო მაჩვენებელზე მაღალია. თუმცა, ვინაიდან დღეს ბაზარზე უფრო მაღალშემოსავლიანი ალტერნატივებიც არსებობს, მხოლოდ დივიდენდი აქციების მიმართ ინტერესის შესანარჩუნებლად საკმარისი არ აღმოჩნდა.

კომპანიის აქციების ფასი მოგებასთან შეფარდებით (P/E კოეფიციენტი) დაახლოებით 23-ია, რაც S&P 500-ის საშუალო დონესთან ახლოსაა. ანალიტიკოსების შეფასებით, McDonald’s უფრო მეტად საინტერესო იმ ინვესტორებისთვისაა, რომლებიც სტაბილურობასა და დივიდენდების გრძელვადიან ზრდას ეძებენ. მათთვის კი, ვინც აქციებისგან სწრაფ ზრდას ელის, ბაზარზე ბევრად მაღალი პოტენციალის მქონე სხვა კომპანიებიც მოიძებნება.

წყარო: Yahoo Finance