Meta-ს აქციების სამიზნე ფასი 835 დოლარზე შენარჩუნდა

„Bank of America“ კომპანია Meta-ს ხელოვნურ ინტელექტში (AI) ჩადებული ინვესტიციების გამო დიდ ფინანსურ ზრდას უწინასწარმეტყველებს, რადგან ახალი ფასიანი სერვისები და ტრილიონიანი კორპორატიული ბაზრის ათვისება მის შემოსავლებს მნიშვნელოვნად გაზრდის. ოქტომბრის ფინანსური ანგარიშის შემდეგ ბაზარზე გაჩენილი შიშების მიუხედავად, რომელიც AI ინფრასტრუქტურაზე გაწეულ უზარმაზარ ხარჯებს უკავშირდებოდა, ბანკი აქციებზე შესყიდვის რეკომენდაციას და 835-დოლარიან სამიზნე ფასს უცვლელად ტოვებს.

ვითარების დასტაბილურების მთავარი ფაქტორი ახალი პროდუქტების მონეტიზაციაა, რის ფარგლებშიც კომპანიამ სინგაპურში, გვატემალასა და ბოლივიაში უკვე აამოქმედა ფასიანი გამოწერები: „Meta One Plus“ (თვეში 7.99 დოლარი) და „Meta One Premium“ (თვეში 19.99 დოლარი). გათვლების მიხედვით, თუ მომხმარებელთა საერთო ბაზის მხოლოდ 1 პროცენტი მაინც აირჩევს ფასიან ვერსიას, ეს კომპანიას წლიურად 4.2 მილიარდი დოლარის დამატებით შემოსავალს მოუტანს. შემოსავლების დივერსიფიკაციის მიზნით, Meta-მ შექმნა კორპორატიული სერვისების განყოფილება, რომელიც ბიზნესებს AI ინსტრუმენტების დანერგვაში დაეხმარება. ამასთან, მარკ ცუკერბერგის განცხადებით, მომავალში Meta-მ შესაძლოა საკუთარი ტექნიკური რესურსების ნაწილი სხვა კომპანიებსაც მიაწოდოს. ექსპერტების შეფასებით, ბიზნესისთვის განკუთვნილი ხელოვნური ინტელექტის სერვისებზე მოთხოვნა მომდევნო წლებში მნიშვნელოვნად გაიზრდება, რაც Meta-სთვის შემოსავლის ახალი წყაროს შექმნის და კომპანიას ხელოვნურ ინტელექტში გაწეული დიდი დანახარჯების ანაზღაურებაში დაეხმარება. მიუხედავად ასეთი პოზიტიური პროგნოზისა, ანალიტიკოსები რისკ-ფაქტორებად კვლავ ასახელებენ ციფრულ რეკლამაზე მაღალ დამოკიდებულებას, მზარდ ხარჯებს, ახალი AI პლატფორმებისგან მომავალ კონკურენციასა და მკაცრ მარეგულირებელ ჩარჩოებს.

წყარო: Investing.com