Morgan Stanley ევროპულ ენერგოსექტორში Galp-ს გამოარჩევს
ნავთობის გაიაფების მოლოდინში Morgan Stanley ინვესტორებს ევროპულ ენერგოსექტორში პორტფელის გადახედვას ურჩევს. ანალიტიკოსები ვარაუდობენ, რომ 2026 წლის შემდეგ Brent-ის ტიპის ნავთობის ფასი ბარელზე დაახლოებით 70 დოლარი იქნება. წლევანდელი გაძვირების შემდეგ ეს ნავთობის ფასის შესაძლო შემცირებაზე მიანიშნებს. ამის გამო Morgan Stanley ევროპულ ენერგოკომპანიებთან მიმართებით უფრო ფრთხილ საინვესტიციო მიდგომას ირჩევს.
ამ მიდგომის ფარგლებში Morgan Stanley-მ პორტუგალიური Galp-ის შეფასება გააუმჯობესა და მისი აქციები „Overweight“ კატეგორიაში გადაიყვანა. მარტივად რომ ვთქვათ, ბანკი ელოდება, რომ Galp-ის აქციები ბაზარზე საშუალოზე უკეთეს შედეგს აჩვენებს.
ანალიტიკოსების შეფასებით, Galp-ის პოზიციას ნავთობის მოპოვების ზრდა, ვალის შემცირება და კაპიტალური ხარჯების კლება აძლიერებს. ეს ფაქტორები კომპანიას დაეხმარება, ნავთობის გაიაფების შემთხვევაშიც შეინარჩუნოს აქციონერებისთვის მიმზიდველი დივიდენდები. დადებით ფაქტორად განიხილება Galp-ის ბიზნესის შესაძლო რესტრუქტურიზაციაც.
Morgan Stanley უფრო თავშეკავებულია ესპანურ Repsol-სა და ავსტრიულ OMV-თან მიმართებით. Repsol-ის შემთხვევაში ბანკი მიიჩნევს, რომ ნავთობის გადამუშავებიდან მიღებული მაღალი მოგება აქციების ფასში უკვე ასახულია. ამიტომ, ნავთობის გაიაფების შემთხვევაში, კომპანია Galp-თან შედარებით ნაკლებად ხელსაყრელ მდგომარეობაში შეიძლება აღმოჩნდეს.
OMV-ის მიმართ სიფრთხილე ქიმიური პროდუქტების ბაზარზე არსებულ გაურკვევლობას და კომპანიის ახალი სტრატეგიის მოლოდინს უკავშირდება.
Morgan Stanley-ის შეფასებით, ნავთობის ფასების კლების პირობებში ინვესტორებისთვის უფრო საინტერესო იქნება ის ენერგოკომპანიები, რომლებსაც სტაბილური შემოსავალი, დაბალი ხარჯები და აქციონერებისთვის დივიდენდების შენარჩუნების შესაძლებლობა აქვთ.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
