ნავთობის ფასი ჰორმუზის სრუტეში მომხდარი ინციდენტის შემდეგ გაიზარდა

ჰორმუზის სრუტესთან უსაფრთხოების ახალი რისკების გაჩენის შემდეგ ნავთობი გაძვირდა. Brent-ისა და WTI-ის მარკის ნავთობის ფასი დაახლოებით 0.8%-დან 1%-მდე გაიზარდა. მიზეზი ომანის სანაპიროსთან მომხდარი ინციდენტი გახდა, როდესაც ერთ-ერთ ტანკერზე აფეთქება მოხდა და ხანძარი გაჩნდა. შემთხვევას მსხვერპლი არ მოჰყოლია, თუმცა ინვესტორებმა კიდევ ერთხელ გაითვალისწინეს, რომ ჰორმუზის სრუტეში გადაზიდვებთან დაკავშირებული რისკები კვლავ არსებობს. სწორედ ამ მარშრუტით გადაადგილდება მსოფლიოში ექსპორტირებული ნავთობის მნიშვნელოვანი ნაწილი.

ამავდროულად, მოსალოდნელია ნავთობის მიწოდების ზრდაც. Saudi Aramco-მ აზიელი მყიდველებისთვის ნავთობის ფასები შეამცირა, რაც 2020 წლის შემდეგ პირველად მოხდა. OPEC+-მაც აგვისტოდან მოპოვების გაზრდის გადაწყვეტილება მიიღო. ჩვეულებრივ, ასეთი ნაბიჯები ფასის შემცირებას უწყობს ხელს, თუმცა ახლო აღმოსავლეთში არსებული ვითარება ამ ეტაპზე ბაზარზე უფრო დიდ გავლენას ახდენს.

ანალიტიკოსების შეფასებით, ნავთობის მიწოდება მომავალ პერიოდში გაიზრდება, თუმცა საწვავზე მოთხოვნა კვლავ მაღალია. ამიტომ ფასების მკვეთრ შემცირებას ჯერჯერობით არ ელოდებიან. ახლა ბაზრის ყურადღება აშშ-ის ენერგეტიკის საინფორმაციო ადმინისტრაციის (EIA) მორიგ ანგარიშზეა გადატანილი, რომელიც წარმოებისა და მოთხოვნის შესახებ ახალ მონაცემებს გამოაქვეყნებს. ექსპერტების შეფასებით, უახლოეს პერიოდში ნავთობის ფასზე ყველაზე დიდი გავლენა კვლავ ჰორმუზის სრუტეში არსებული ვითარებისა და სპარსეთის ყურიდან ექსპორტის მოცულობას ექნება.

წყარო: Investing.com