ნიუ-იორკმა მასშტაბური მონაცემთა ცენტრების მშენებლობა ერთი წლით შეაჩერა
ხელოვნური ინტელექტის სწრაფმა განვითარებამ და ელექტროენერგიაზე გაზრდილმა მოთხოვნამ ნიუ-იორკის ხელისუფლებას მონაცემთა ცენტრების მშენებლობაზე შეზღუდვების დაწესებისკენ უბიძგა. ნიუ-იორკი აშშ-ის პირველი შტატი გახდა, რომელმაც მასშტაბური მონაცემთა ცენტრების მშენებლობაზე ერთწლიანი მორატორიუმი გამოაცხადა.
გადაწყვეტილების მიზეზად ელექტროენერგიის გადასახადების ზრდა, წყლის რესურსებზე გაზრდილი დატვირთვა და ადგილობრივ მოსახლეობაზე შესაძლო გავლენა სახელდება. ნიუ-იორკის გუბერნატორის, ქეითი ჰოკულის განცხადებით, ხელისუფლებამ მოსახლეობა ხარჯების ზრდისა და ბუნებრივი რესურსების შემცირებისგან უნდა დაიცვას.
გუბერნატორი დიდი მონაცემთა ცენტრებისთვის მოქმედი საგადასახადო შეღავათების გაუქმებასაც გეგმავს. მორატორიუმის პერიოდში შტატის გარემოს დაცვის დეპარტამენტი გარემოზე ზემოქმედების შეფასებას მოამზადებს და ახალი სტანდარტების შემუშავებაზე იმუშავებს. ახალი პროექტების განხორციელება მხოლოდ ამ მოთხოვნების დამტკიცების შემდეგ გახდება შესაძლებელი.
გადაწყვეტილებას ტექნოლოგიურ სექტორში განსხვავებული შეფასებები მოჰყვა. ზოგიერთი მიიჩნევს, რომ მშენებლობის ერთწლიანი შეჩერება ინვესტორებს სხვა შტატებისკენ უბიძგებს, თუმცა საზოგადოებრივი აზრი ხელისუფლების გადაწყვეტილებას უფრო მეტად ემხრობა. ბოლო გამოკითხვების მიხედვით, მონაცემთა ცენტრების სწრაფ მშენებლობას ამერიკელთა მხოლოდ მესამედი უჭერს მხარს, მოსახლეობის უმრავლესობას კი ასეთი ობიექტების საკუთარ დასახლებებში განთავსება არ სურს.
ნიუ-იორკში ამჟამად 130-ზე მეტი მონაცემთა ცენტრი მუშაობს. ხელოვნური ინტელექტის სფეროს გაფართოებასთან ერთად კი მათთვის საჭირო ელექტროენერგიის მოცულობა სწრაფად იზრდება.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
