რა შეიცვლება ჰორმუზის სრუტის გახსნის შემდეგ

ჰორმუზის სრუტის გახსნაზე შესაძლოა მალევე შეთანხმდნენ, თუმცა Capital Economics-ის შეფასებით, ენერგეტიკულ ბაზარზე ვითარების სრულად გამოსწორებას დრო დასჭირდება.

ჰორმუზის სრუტის გახსნის შემდეგ ტანკერების მოძრაობა ისევ მოიმატებს, თუმცა Capital Economics ნავთობის ფასის მკვეთრ შემცირებას არ ელოდება. მიზეზი ისაა, რომ სპარსეთის ყურეში გასატანი ნავთობის მოცულობა ახლა ივნისთან შედარებით ნაკლებია.

კიდევ ერთი მნიშვნელოვანი საკითხია, რამდენად სწრაფად აღდგება ნავთობის წარმოება ახლო აღმოსავლეთში. ივლისში რეგიონიდან ექსპორტი ომამდელ დონეს დღეში დაახლოებით 9 მილიონი ბარელით ჩამორჩებოდა. ნავთობკომპანიების შეფასებით, წარმოებისა და გადამუშავების სრულად აღდგენას რამდენიმე თვე დასჭირდება.

უფრო რთული ვითარებაა ყატარში, სადაც ირანის თავდასხმების შედეგად თხევადი ბუნებრივი აირის წარმოების 17% შეჩერებულია და აღნიშნულის აღდგენას ორი-სამი წელი დასჭირდება.

მნიშვნელოვანი საკითხია ნავთობის მსოფლიო მარაგებიც. ენერგეტიკის საერთაშორისო სააგენტოს წევრმა ქვეყნებმა დეფიციტის შესავსებად სტრატეგიული რეზერვებიდან 400 მილიონი ბარელი ნავთობი გამოიყენეს, თუმცა ეს მოცულობა, სავარაუდოდ, სექტემბრის დასაწყისში ან შუა რიცხვებში ამოიწურება.

Capital Economics-ის შეფასებით, ბაზარზე მიწოდების დამატებითი შემცირების თავიდან ასაცილებლად ახლო აღმოსავლეთიდან ექსპორტი მომდევნო თვეში დღეში 2-3 მილიონი ბარელით უნდა გაიზარდოს. წინააღმდეგ შემთხვევაში, ქვეყნებს შესაძლოა სტრატეგიული მარაგების გამოყენება კვლავ მოუწიოთ.

ვითარებაზე გავლენას ახდენს ჩინეთიდან ნავთობზე მოთხოვნის შემცირებაც, მაშინ როცა აშშ ნავთობპროდუქტების ექსპორტს ზრდის. ამასთან, ანალიტიკოსები არ გამორიცხავენ, რომ ბენზინის მაღალი ფასების გამო დონალდ ტრამპის ადმინისტრაციამ ნავთობპროდუქტების ექსპორტის შეზღუდვაც განიხილოს.

ჰორმუზის გახსნა ბუნებრივი აირის ბაზარზეც გარკვეულ გავლენას მოახდენს, თუმცა ევროპაში ფასების მნიშვნელოვანი შემცირება უახლოეს პერიოდში ნაკლებად მოსალოდნელია. ზამთრის მოახლოების ფონზე ევროპის გაზსაცავებში მარაგი წინა წლებთან შედარებით დაბალია.

Capital Economics-ის პროგნოზით, Brent-ის ნავთობის ფასი წლის ბოლოს ბარელზე დაახლოებით 75 დოლარი იქნება, ხოლო ევროპაში ბუნებრივი აირის ფასი ზამთრის განმავლობაში მეგავატსაათზე 50-55 ევროს ფარგლებში დარჩება.

წყარო: Investing.com