სამხრეთ კორეა Google-ს ანტიმონოპოლიური წესების დარღვევაში ადანაშაულებს

სამხრეთ კორეის ანტიმონოპოლიურმა უწყებამ Google-ის წინააღმდეგ საქმის შესწავლა დაასრულა, რის შედეგადაც ტექნოლოგიურ გიგანტს მრავალმილიარდიანი ჯარიმა ემუქრება. ქვეყნის სამართლიანი ვაჭრობის კომისიის (KFTC) განცხადებით, კომპანიამ Android-ის აპლიკაციების ბაზარზე თავისი დომინირებული მდგომარეობა კონკურენციის შესაზღუდად გამოიყენა.

გამოძიების ფოკუსში მოექცა პროგრამა სახელწოდებით „Project Hug“, რომელიც 2019 წლიდან 2026 წლის მარტამდე მოქმედებდა. ამ პროექტის ფარგლებში, Google თამაშების დეველოპერებს ფინანსურ მხარდაჭერას სთავაზობდა ისეთი სერვისების გამოყენებისას, როგორიცაა Cloud, Ads და YouTube. სანაცვლოდ, დეველოპერებს თამაშები Google Play-ზე ექსკლუზიური ან განსაკუთრებული პირობებით უნდა განეთავსებინათ.

ხელშეკრულებები ისე იყო სტრუქტურირებული, რომ რაც მეტ შემოსავალს იღებდა დეველოპერი Google-ის მეშვეობით, მით მეტ შეღავათს იღებდა კომპანიისგან, რაც მას სხვა მაღაზიებთან თანამშრომლობის სტიმულს უკარგავდა.

მარეგულირებლის დასკვნით, ამ ქმედებამ დაბლოკა კონკურენტების, მათ შორის სამხრეთკორეული პლატფორმა OneStore-ის საქმიანობა და დეველოპერები აიძულა, ფაქტობრივად, ექსკლუზიურად მხოლოდ Google-თან ეთანამშრომლათ. საქმე ეხება დაახლოებით 9.1 მილიარდი დოლარის ღირებულების ბრუნვას. დარღვევის საბოლოოდ დადასტურების შემთხვევაში, Google-ს შესაძლოა ამ თანხის 6%-მდე ოდენობის ჯარიმის გადახდა მოუწიოს.

თავად Google ბრალდებებს არ ეთანხმება და აცხადებს, რომ მათ პლატფორმას სარგებელი მოაქვს როგორც დეველოპერებისთვის, ისე მომხმარებლებისთვის. კომპანიას რვა კვირა აქვს საკუთარი პოზიციის ოფიციალურად წარსადგენად, რის შემდეგაც კომისია საბოლოო გადაწყვეტილებას მიიღებს.

წყარო: Investing.com