სასამართლომ Apple-ს $5.7 მილიარდის გადახდა დააკისრა

აშშ-ის ნაფიც მსაჯულთა სასამართლომ დაადგინა, რომ Apple-მა კომპანია Taction-ის ორი პატენტი დაარღვია. გადაწყვეტილების მიხედვით, ტექნოლოგიურმა გიგანტმა სან-დიეგოში დაფუძნებულ კომპანიას $5.7 მილიარდზე მეტი უნდა გადაუხადოს.

საქმე iPhone-სა და Apple Watch-ში გამოყენებულ Taptic Engine-ს ეხება. ეს სისტემა მომხმარებელს შეხებაზე ფიზიკური რეაქციით პასუხობს. Taction ამტკიცებდა, რომ Apple ამ ფუნქციის შესაქმნელად მის მიერ დაპატენტებულ ტექნოლოგიას იყენებდა. ნაფიცმა მსაჯულებმა ეს არგუმენტი გაიზიარეს და დაადგინეს, რომ Apple-მა Taction-ის პატენტები დაარღვია.

Apple გადაწყვეტილებას გაასაჩივრებს. კომპანიის განცხადებით, Taptic Engine სრულიად განსხვავებულ ტექნოლოგიას ეყრდნობა და Taction-ის საკუთარი კვლევებიც ამას ადასტურებს. Apple პატენტების ნამდვილობასაც ეჭვქვეშ აყენებს.

Taction-მა სარჩელი 2021 წელს შეიტანა. 2023 წელს ფედერალურმა მოსამართლემ Apple-ის დარღვევა ვერ დაადგინა, თუმცა სააპელაციო სასამართლომ საქმე ხელახლა განსახილველად დააბრუნა. Reuters-ის ცნობით, $5.7-მილიარდიანი თანხა აშშ-ის ისტორიაში პატენტთან დაკავშირებული ყველაზე დიდი სასამართლო გადაწყვეტილებაა.

წყარო: Reuters