სმარტფონების მსოფლიო ბაზარი თავის ისტორიაში ყველაზე სუსტი წლისთვის ემზადება

სმარტფონების გლობალური ბაზარი თავის ისტორიაში ყველაზე სუსტი წლისთვის ემზადება, რისი მთავარი მიზეზიც ხელოვნური ინტელექტით გამოწვეული მეხსიერების ჩიპების უპრეცედენტო დეფიციტია. International Data Corporation-ის (IDC) უახლესი ანალიზის მიხედვით, 2026 წელს სმარტფონების მიწოდება 13.9%-ით შემცირდება. აღსანიშნავია, რომ თებერვალში ეს პროგნოზი 12.9%-ს შეადგენდა, თუმცა ვითარება დამძიმდა და ახლა ეს ბაზრის ისტორიაში ყველაზე მკვეთრი ვარდნა იქნება.

მეხსიერების ჩიპების გლობალურმა კრიზისმა ინდუსტრიაში ხარჯების სერიოზული ზრდა გამოიწვია, რის გამოც მწარმოებლები იძულებულნი არიან გაზარდონ ფასები ან საერთოდ უარი თქვან გარკვეული კონფიგურაციის მოდელების გამოშვებაზე. ვითარებას კიდევ უფრო ამძიმებს აშშ-სა და ირანს შორის მიმდინარე ომი, რომელმაც ლოგისტიკური და გადაზიდვის ხარჯები გაზარდა. IDC-ის დირექტორის, ნაბილა პოპალის განცხადებით, ეს ზეწოლა აიძულებს კომპანიებს შეამცირონ მიწოდება და ფოკუსირება ძვირადღირებულ სეგმენტზე მოახდინონ. შედეგად, სმარტფონის საშუალო ფასი სარეკორდო ნიშნულამდე, 550 დოლარამდე გაიზარდა, რაც გასულ წელთან შედარებით 100 დოლარით მეტია.

კრიზისმა ყველაზე დიდი დარტყმა Android-ის ბაზარს მიაყენა, სადაც მიწოდების 20%-იანი წლიური ვარდნა ფიქსირდება. თუმცა, Samsung-ი პრემიუმ და საშუალო კლასის სერიების ხარჯზე, მცირე კომპანიების პოზიციების დაკავებას და წილის გაზრდას მაინც ახერხებს. რაც შეეხება Apple-ს, კომპანია შედარებით უკეთეს ვითარებაშია: მოსალოდნელი 8.1%-იანი კლების ნაცვლად, მაჩვენებელი მხოლოდ 5.2%-მდე დაეცა. მეტიც, გარდა ამისა, Apple-ის iPhone-იდან მიღებული შემოსავალი 20%-ით გაიზარდა, რაც iPhone 17-ის ხაზმა და ჩინეთის ბაზარმა განაპირობა. თუმცა, კომპანიის დირექტორმა, ტიმ კუკმა გააფრთხილა საზოგადოება, რომ ჩიპებისა და პროცესორების დეფიციტი სამომავლოდ Apple-ის მოგების მარჟაზეც უარყოფით გავლენას მოახდენს.

წყარო: Yahoo Finance