SoftBank-ის ინვესტიცია საფრანგეთში 75 მილიარდ ევრომდე იზრდება
ევროპის ხელოვნური ინტელექტის ერთ-ერთი ყველაზე მასშტაბური პროექტი იწყება. კორპორაცია SoftBank Group-ი საფრანგეთში, ხელოვნური ინტელექტის მონაცემთა ცენტრების მშენებლობისა და მართვისთვის, 75 მილიარდ ევრომდე ინვესტირებას გეგმავს, რაც ჯამში 5 გიგავატი მოცულობის სიმძლავრეს უზრუნველყოფს. ეს გადაწყვეტილება პრეზიდენტ ემანუელ მაკრონის ინიციატივის ნაწილია და პირველ ეტაპზე 45 მილიარდი ევროს გამოყოფას ითვალისწინებს, რათა 2031 წლამდე ო-დე-ფრანსის რეგიონში 3.1 გიგავატი სიმძლავრის ინფრასტრუქტურა განვითარდეს. პროექტის საწყისი ფაზა მოიცავს ობიექტებს დიუნკერკში, ბოსკელსა და ბუშენში, რაც მიზნად ისახავს ხელოვნური ინტელექტის კომპანიების, ქლაუდ-პროვაიდერებისა და კვლევითი ორგანიზაციების მხრიდან მაღალი წარმადობის გამოთვლით სიმძლავრეებზე მზარდი მოთხოვნის დაკმაყოფილებას. გარდა ამისა, SoftBank-ი Schneider Electric-თან ერთად დიუნკერკის პორტში საწარმოო სივრცეს შექმნის, სადაც მონაცემთა ცენტრისთვის საჭირო ნაწილები დამზადდება. ეს პროექტი ევროპას ამ ტიპის ტექნიკის ადგილობრივად წარმოებაში დაეხმარება. აღნიშნული ინვესტიცია ათასობით კვალიფიციურ სამუშაო ადგილს შექმნის და საფრანგეთის უნივერსიტეტებთან კვლევითი და განვითარების მიმართულებით პარტნიორობას შეუწყობს ხელს.
წყარო: Investing.com
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
