ტრამპის კრიპტო შემოსავალმა 1.2 მილიარდ დოლარს გადააჭარბა
აშშ-ის პრეზიდენტ დონალდ ტრამპის ფინანსურ დეკლარაციაში მისი კრიპტო აქტივები და ციფრული ვალუტებიდან მიღებული შემოსავლები ერთ-ერთ მთავარ ფინანსურ მიმართულებად ფიქსირდება.
აშშ-ის სამთავრობო ეთიკის ოფისმა ტრამპის ყოველწლიური ფინანსური დეკლარაცია გამოაქვეყნა. დოკუმენტის მიხედვით, 2025 წელს პრეზიდენტის შემოსავალმა კრიპტოვალუტასთან დაკავშირებული ბიზნესებიდან 1.2 მილიარდ დოლარს გადააჭარბა. თითქმის 900-გვერდიან დეკლარაციაში აღწერილია ტრამპის სხვადასხვა ბიზნესინტერესი, მათ შორის ციფრული აქტივები, რომლებიც მისი შემოსავლის ერთ-ერთ ყველაზე მსხვილ წყაროდ იქცა.
დეკლარაციის თანახმად, ტრამპმა 635 მილიონ დოლარზე მეტი მიიღო TRUMP მემკოინთან დაკავშირებული სალიცენზიო შეთანხმებიდან. მონეტა Solana-ს ქსელში 2025 წლის იანვარში გაეშვა. გაშვების შემდეგ მისი საბაზრო ღირებულება სწრაფად გაიზარდა, თუმცა მოგვიანებით ფასი მკვეთრად დაეცა.
ტრამპმა მნიშვნელოვანი შემოსავალი მიიღო World Liberty Financial-იდანაც. ეს არის დეცენტრალიზებული ფინანსებისა და სტეიბლკოინების პლატფორმა, რომელიც ტრამპის ოჯახთან არის დაკავშირებული. დეკლარაციის მიხედვით, ამ პროექტიდან მიღებულმა შემოსავალმა რამდენიმე ასეულ მილიონ დოლარს გადააჭარბა.
პრეზიდენტის კრიპტო აქტივებს შორის ასევე ფიქსირდება ბიტკოინი და ეთერიუმი. დეკლარაციაში ბიტკოინის ღირებულება 50 მილიონ დოლარზე მეტით არის შეფასებული, ეთერიუმის მოცულობა კი 5-დან 25 მილიონ დოლარამდე მერყეობს.
ტრამპის კრიპტო საქმიანობა ამერიკელ კანონმდებლებს შორის დავის საგანია. დემოკრატების ნაწილი მიიჩნევს, რომ პრეზიდენტისა და მისი ოჯახის კრიპტო ბიზნესები ინტერესთა კონფლიქტის რისკს ქმნის. ამ ფონზე კონგრესში განიხილება ინიციატივები, რომლებიც მაღალი თანამდებობის პირებისთვის კრიპტო ბიზნესთან დაკავშირებულ ეთიკურ შეზღუდვებს გაამკაცრებს.
წყარო: Yahoo Finance
მიიღე ჩვენი უახლესი საბაზრო ანალიზი და ფინანსური მიმოხილვები პირდაპირ ელფოსტაზე. სპამის გარეშე — მხოლოდ მნიშვნელოვანი.
